O CiMUS da Universidade de Santiago de Compostela (USC) coordina InnovaRTBRAIN (Innovative Radiotherapy for Brain Tumours), un proxecto europeo para desenvolver unha nova xeración de radioterapia contra os tumores cerebrais, especialmente os gliomas, un dos tumores máis agresivos e complexos. O proxecto busca deseñar novos enfoques de radioterapia máis precisos, efectivos e seguros que os procedementos actuais.
A coordinación corresponde ao equipo Novas estratexias en Radioterapia do centro, dirixido pola investigadora Yolanda Prezado. O proxecto está financiado polo programa europeo Marie Skłodowska-Curie Doutoral Networks e ten unha duración de catro anos.
InnovaRTBRAIN reúne unha rede internacional de universidades, centros de investigación, hospitais e empresas tecnolóxicas de varios países europeos. Entre as entidades participantes figuran o DKFZ German Cancer Research Center, a Universidade of Antwerp, o INEM – Institut Necker Enfants Malades, a Universidade de Oslo e a Universidade de Pavia, xunto a empresas como VARIAN medical systems, Batea Oncology ou Xstrahl. A rede integra profesionais da física médica, a bioloxía, a enxeñaría e a oncoloxía radioterápica.
Unha achega integral do glioma
Os gliomas representan un dos maiores retos en oncoloxía pola súa elevada resistencia aos tratamentos, a súa capacidade para infiltrarse no tecido cerebral san e a complexidade biolóxica do seu contorno tumoral. Para abordalos, o proxecto combinará investigación básica, desenvolvemento tecnolóxico e aplicación clínica, co fin de comprender mellor a resposta dos tumores á radiación e trasladar ese coñecemento a novas estratexias terapéuticas.
No ámbito tecnolóxico, InnovaRTBRAIN aposta por estratexias de irradiación espacialmente fraccionada, a terapia FLASH, a protónterapia e a terapia alfa dirixida, co obxectivo de aumentar a eficacia do tratamento reducindo o dano no tecido san. Tamén explora estratexias baseadas na interacción entre radiación e inmunidade, incluída a integración con inmunoterapia ou terapias celulares.
Formación de novos especialistas
O proxecto ten ademais unha dimensión formativa: a rede financiará 14 contratos predoutorais distribuídos entre as institucións participantes, co obxectivo de formar unha nova xeración de científicos en investigación, innovación e emprendemento en oncoloxía radioterápica. Os proxectos abrangen áreas como as novas modalidades de radioterapia (FLASH-RT, Minibeam Radiation Therapy ou terapias alfa dirixidas), a inmunoterapia, as terapias CAR-T, a dosimetría avanzada, a imaxe médica, a análise multiómica e a bioloxía do microambiente tumoral.
O obxectivo final é mellorar a calidade de vida dos pacientes con tumores cerebrais mediante tratamentos máis efectivos e con menos efectos secundarios, e acelerar a transferencia de coñecemento cara ao contorno clínico e industrial.
Claves
- A rede mantén aberto o proceso de selección para varias das categorías predoutorais ofertadas en universidades, hospitais e empresas de distintos países europeos.
- As oportunidades de formación e investigación inclúen ámbitos como a radiobioloxía, a inmunoloxía, a física médica, a bioinformática ou a enxeñaría biomédica.
