Un total de 50.415 persoas participaron no ensaio clínico Sincigal, posto en marcha pola Xunta de Galicia para avaliar a redución de ingresos hospitalarios mediante a vacinación fronte ao virus respiratorio sincitial (VRS). A Consellería de Sanidade informou este martes do peche desta iniciativa, que comezou a finais de novembro e se estendeu ata finais de febreiro.

A Consellería de Sanidade e a Fundación Pública Galega Instituto de Investigación Sanitaria de Santiago de Compostela buscan comprobar de maneira científica a eficiencia da vacina fronte ao VRS en adultos. Trátase dunha iniciativa similar ao ensaio Galflu, que logrou incluír a vacina de alta carga fronte á gripe para maiores de 70 anos na comunidade galega.

Por distritos sanitarios, participaron 11.972 persoas da Coruña; 920 de Cee; 5.273 de Lugo; 1.182 da Mariña; 719 de Monforte de Lemos; 6.285 de Ourense; 648 de Verín; 732 do Barco de Valdeorras; 4.926 de Pontevedra; 1.908 do Salnés; 5.624 de Santiago de Compostela; 807 de Barbanza; 3.978 de Ferrol e 5.441 de Vigo.

Respecto á distribución por grupos de idade, participaron 2.816 persoas de 18 a 40 anos; 3.999 de 41 a 50; 8.803 de 51 a 60 anos; 18.232 de 61 a 70; 10.846 de 71 a 80; 4.645 de 81 a 90 anos; e 1.074 maiores de 90. Por sexo, do total de participantes, 26.157 eran homes e 24.258 mulleres.

O ensaio Sincigal forma parte da estratexia galega de saúde pública pragmática, que integra a investigación clínica co sistema sanitario real para xerar evidencias útiles. O obxectivo é optimizar a toma de decisións sobre políticas de vacinación, segundo explica Sanidade.

O VRS é un virus habitual que, na maioría dos casos, xera síntomas leves parecidos aos dun arrefriado común, como dor de gorxa, tose ou conxestión nasal. Porén, en lactantes, en adultos de idade avanzada e en persoas con patoloxías crónicas, pode causar problemas pulmonares graves que requiren hospitalización.

A Consellería subliña que este virus é responsable cada ano de centos de hospitalizacións en Galicia. Ademais, a enfermidade en adultos pode agravar patoloxías como a enfermidade pulmonar obstructiva crónica ou a insuficiencia cardíaca.

Actualmente, a Xunta ofrece a inmunización fronte ao virus respiratorio sincitial de 0 a 6 meses, cunha cobertura próxima ao 100%. Esta protección, introducida en Galicia en 2023, permitiu reducir as hospitalizacións en máis do 90% por esta infección nos nenos e nenas vacinados.