O investimento en actuacións de conservación e seguridade viaria nas estradas estatais da provincia de Lugo incrementouse un 87,31% en once anos —entre 2014 e 2024— ao pasar de 13,56 millóns de euros a 25,39 millóns no último destes exercicios.

Resposta á pregunta parlamentaria

O senador socialista por Lugo, César Mogo, destacou este dato en resposta do Goberno a unha pregunta formulada polos senadores do Partido Popular por Lugo José Manuel Barreiro, José Manuel Balseiro e Juan Serrano, en relación coa alta sinistralidade viaria rexistrada nas estradas lucenses durante a primeira quincena do pasado mes de xaneiro.

Na súa resposta, o Ministerio de Transportes e Mobilidade Sostible sinalou que esa "alta sinistralidade" —con catro falecidos nesa primeira quincena do ano— non é aplicable ás vías da rede estatal, xa que nese período "non se rexistrou nelas ningunha vítima mortal", segundo indica.

Sinistralidade na rede estatal

Respecto aos datos de sinistralidade correspondentes a 2025, o Goberno explica que na rede estatal en Lugo o 100% dos accidentes mortais se deberon a factores directamente imputables ao comportamento dos usuarios.

O Goberno explica que o 100% dos accidentes mortais se deberon ao comportamento dos usuarios

Causas dos accidentes mortais

En concreto, dos sete accidentes mortais rexistrados ese ano, seis foron por causas atribuíbles aos condutores: en tres casos por infraccións de tráfico, en dous por distraccións, nun por velocidade inadecuada e noutro por cansazo ou somnolencia.

O sétimo sinistro mortal, do que aínda se están a investigar as causas, produciuse o pasado 13 de decembro no termo municipal de Begonte, na ligazón entre as autovías A-6 e A-8, onde un peón foi atropelado mentres camiñaba pola vía tras baixarse do seu vehículo sen un motivo aparente, xa que ao parecer non sufrira ningunha avaría nin ningún outro contratempo que lle impedise continuar a súa marcha.

Estado das estradas

O Goberno central subliña, en todo caso, que en ningún dos accidentes mortais rexistrados na rede estatal en Lugo no período dos doce anos comprendidos entre 2014 e 2025 o estado da estrada foi a causa do sinistro.