O Estado aumentou un 87% o investimento en estradas de Lugo

A inversión en actuacións de conservación e seguridade viaria nas estradas estatais da provincia de Lugo incrementouse un 87,31% en once anos —entre 2014 e 2024— ao pasar de 13,56 millóns de euros a 25,39 millóns no último deses exercicios.

Resposta á pregunta parlamentaria

O senador socialista por Lugo, César Mogo, destacou este dato en resposta do Governo a unha pregunta plantexada polos senadores do Partido Popular por Lugo José Manuel Barreiro, José Manuel Balseiro e Juan Serrano, en relación coa alta sinistralidade viaria rexistrada nas estradas lucenses durante a primeira quincena do pasado mes de xaneiro.

Na súa resposta, o Ministerio de Transportes e Mobilidade Sostible sinalou que esa «alta sinistralidade» —con catro falecidos nessa primeira quincena do ano— non é aplicable ás vías da rede estatal, xa que nese período «non se rexistrou nelas ningunha vítima mortal», segundo indica.

Sinistralidade na rede estatal

Respecto dos datos de sinistralidade correspondentes a 2025, o Goberno explica que na rede estatal en Lugo o 100% dos accidentes mortais débense a factores directamente imputables ao comportamento dos usuarios.

O Goberno explica que o 100% dos accidentes mortais débese ao comportamento dos usuarios

Causas dos accidentes mortais

En concreto, dos sete accidentes mortais rexistrados ese ano, seis foron por causas atribuíbles aos condutores: en tres casos por infraccións de tráfico, en dous por distraccións, nun por velocidade inadecuada e noutro por cansazo ou somnolencia.

O sétimo sinistro mortal, das causas do cal aínda se están investigando, produciuse o pasado 13 de decembro no termo municipal de Begonte, no enlace entre as autovías A-6 e A-8, onde un peatón foi atropelado mentres camiñaba pola vía tras baixarse do seu vehículo sen un motivo aparente, xa que ao parecer non sufrira ningunha avaría nin calquera outro percance que lle impedise seguir a súa marcha.

Estado das estradas

O Goberno central subliña, en todo caso, que en ningún dos accidentes mortais rexistrados na rede estatal en Lugo no período dos doce anos comprendidos entre 2014 e 2025 o estado da estrada foi a causa do sinistro.