O índice de prezos de consumo (IPC) de Galicia rexistrou en agosto de 2026 un crecemento interanual do 4,8%, segundo os datos publicados polo Instituto Galego de Estatística (IGE) a partir da información do INE. É a taxa máis elevada desde febreiro de 2023 tanto en Galicia como en España, e supera en cinco décimas a media estatal, situada no 4,3%.
En variación mensual, os prezos aumentaron un 0,9% en Galicia entre xullo e agosto, dúas décimas máis que no conxunto de España (0,7%). No que vai de ano, a subida acumulada na comunidade é do 4,0%, fronte ao 3,3% estatal.
A inflación subxacente, que exclúe os alimentos non elaborados e os produtos enerxéticos, situouse en Galicia no 3,3% interanual, catro décimas por riba do nivel estatal (2,9%).
Transporte e vivenda, os grupos con maiores subidas
Por grupos, o transporte foi o que maior incremento intermensual rexistrou en Galicia, cun 3,9%, mentres que vestido e calzado anotou a maior caída (-1,6%). En termos interanuais, todos os grupos aumentaron os seus prezos agás vestido e calzado (-2,1%). As subidas máis fortes corresponden a transporte (11%) e vivenda, auga, electricidade, gas e outros combustibles (9,3%).
Datos por provincias
A variación mensual dos prezos foi do 0,9% nas catro provincias galegas. En taxa interanual, as cifras oscilaron entre o 4,5% de Lugo e o 4,9% da Coruña e Pontevedra; Ourense situouse no 4,8%.
No conxunto de España, Cantabria (5,1%) e Galicia (4,8%) rexistraron as taxas interanuais máis altas de todas as comunidades e cidades autónomas.
A previsión de setembro apunta ao 5,3%
A previsión avanzada polo IGE para agosto era dun 4,5% interanual, tres décimas inferior ao dato finalmente observado, mentres que na inflación subxacente a predición (3,3%) coincidiu co valor rexistrado. Para setembro de 2026, o IGE prevé que o IPC xeral de Galicia alcance unha taxa interanual do 5,3%, cinco décimas máis que en agosto, cunha variación mensual prevista do 0%.
