As vendas de turismos no mes de febreiro medran, así como o acumulado no que vai de 2026. / Freepik
Despois dun bo comezo de ano, febreiro consolida a tendencia á alza das vendas e matriculacións do sector automobilístico español.
En total matriculáronse 97.082 turismos, un 7,5% máis que no mesmo mes do ano anterior; e a suba do acumulado do ano é do 4,6% interanual cun total de 170.186 unidades matriculadas.
Medran tamén en febreiro todos os canais de venda: particulares, empresas e alugadoras, estas últimas cun 22,6% de diferenza. Porén, no que vai de ano, as vendas a particulares e a empresas caen uns tímidos 1 e 0,4%, respectivamente.
Do mesmo xeito que se confirma a tendencia positiva en canto a vendas, tamén o fai a representación das opcións electrificadas en detrimento sobre todo do diésel. Os coches híbridos tradicionais son, en febreiro, case a metade do mercado (47,9%). Séguenos os motores de gasolina (23,2%), os híbridos enchufables (12,5%), os eléctricos (9,2%), os diésel (4%) e os de gas (3,1%).
O maior crecemento ségueno a rexistrar os motores PHEV, cunha suba do 75,2% na comparativa mes a mes e un crecemento do 71,5% no acumulado do ano. Os seguintes son os coches eléctricos, que con 8.890 unidades medraron un 45,5% no mes e un 38,1% no acumulado do ano. Estas cifras dan esperanza ao mercado eléctrico mentres aínda está pendente de poñer en marcha o Programa Auto+.
A caída dos motores térmicos e dos de gas é innegable. Baixan un 19,5%, un 24% e un 30,4% respectivamente (gasolina, diésel e gas) na comparativa mes a mes e fano un 20,8%, un 28,8% e un 26,4% no acumulado interanual. O peor parado segue sendo o diésel, unha tendencia que pode cambiar tras os últimos anuncios de certas marcas por recuperar estes motores para os mercados europeos.
No que respecta ao resto de categorías, o total de vehículos comerciais lixeiros matriculados en febreiro acadou as 15.754 unidades, un 12,7% máis que no mesmo mes de 2025. Tamén medra un 12,1% o total de vehículos industriais e autobuses, cun total de 2.891 unidades. Ambos mercados soben as cifras acumuladas nestes dous meses de 2026, cun 8,9% e un 7,2%.
