O Instituto Galego de Estatística (IGE) difundiu o seu escenario macroeconómico para Galicia con horizonte quinquenal 2026-2030, no que prevé que o PIB galego medre un 1,9% en 2027 e que a taxa de paro se reduza ata o 7,7% nese mesmo ano.
As previsións apuntan a un crecemento do 2,3% do PIB real en 2026, que se moderaría ata o 1,9% en 2027 e se estabilizaría no 1,6% entre 2028 e 2030. En termos nominais, o PIB a prezos correntes rexistraría taxas de variación do 5,5% en 2026, 4,6% en 2027, 4,0% en 2028, 3,7% en 2029 e 3,6% en 2030.
Por compoñentes da demanda, o gasto en consumo final medrará un 1,1% en 2026 e un 1,2% en 2027, acelerándose ata o 1,6% en 2028. O consumo final dos fogares e ISFLSF avanzará un 1,3% en 2026 e un 1,0% en 2027, mentres que o gasto das administracións públicas pasará dun incremento do 0,3% en 2026 ao 1,5% en 2027. A formación bruta de capital, cun avance previsto do 3,2% en 2026, iríase desacelerando ata o 1,8% en 2030.
As exportacións de bens e servizos medrarán un 1,6% en 2026 e un 2,5% en 2027, mentres que as importacións permanecerán estables en 2026 (0,0%) e subirán un 1,6% en 2027. A contribución do saldo exterior ao crecemento do PIB será do 0,9% en 2026 e do 0,6% en 2027.
En canto ao mercado de traballo, o emprego, medido en postos de traballo equivalentes a tempo completo, medrará un 1,0% en 2026 e un 0,9% en 2027, cunha desaceleración progresiva ata o 0,3% en 2030. A taxa de paro baixaría do 8,0% en 2026 ao 6,8% en 2030. A taxa de actividade situarase no 53,8% en 2026 e a da poboación de 16 a 64 anos no 75,1%, manténdose practicamente estable durante todo o período.
O escenario elaborase a partir das contas económicas anuais e trimestrais do IGE, mediante un modelo de estimación de agregados macroeconómicos a curto prazo, nun marco coherente cos escenarios propostos para as economías española e internacional. Entre os supostos básicos figuran un prezo do petróleo Brent de 89,5 en 2026 e 78,0 en 2027, un tipo de cambio dólar/euro de 1,16 en ambos os anos e unha demanda interna en España do 3,0% en 2026 e do 2,3% en 2027, segundo datos do Banco de España, así como previsións de demanda interna para Francia, Alemaña, Italia, Portugal, Bélxica, Países Baixos, Reino Unido e Estados Unidos, tomadas da Comisión Europea.
