A Deputación de Lugo e FADEMUR, a Federación de Asociacións de Mulleres Rurais de Galicia, asinaron un convenio de colaboración para a xornada con motivo do Día Internacional das Mulleres Rurais, que se celebrará o 15 de outubro no Pazo de Feiras e Congresos de Lugo. O acordo asinárono a presidenta da institución provincial, Carmela López, e a presidenta de FADEMUR, Verónica Marcos, o venres.
A xornada, que levará por lema «Mulleres rurais: liderado, xustiza e dereitos», reunirá a preto de 1.000 mulleres e coincidirá co 20º aniversario de FADEMUR Galicia e co Ano Internacional da Muller Agricultora.
Desenvolvemento da xornada
O encontro comezará ás 11:00 horas coa apertura a cargo da presidenta de FADEMUR Galicia; o secretario xeral de Unións Agrarias UPA, Roberto García; a presidenta estatal de FADEMUR, Teresa López, e a presidenta da Deputación de Lugo. A continuación proxectarase o vídeo «20 anos, poñendo as mulleres rurais no foco», e a Valedora do Pobo de Galicia, María Dolores Fernández Galiño, pronunciará a conferencia inaugural.
Posteriormente terá lugar a mesa redonda «Liderado, mulleres e medio rural en primeiro plano», coa participación de Montse Cortiñas, vicesecretaria xeral de Unión de Pequenos Agricultores e Gandeiros (UPA); M.ª Carmen Sánchez Iravedra, xerente de Embutidos Suarna, empresa de elaboración artesanal de embutidos situada en Navia de Suarna, e Raquel García, responsable comercial de produtos frescos de Vegalsa-Eroski.
Tres referentes da cadea agroalimentaria
FADEMUR quixo reunir voces de mulleres que traballan en distintos ámbitos da cadea agroalimentaria, desde a representación sindical até a transformación e comercialización de produtos. Cortiñas, natural de Chantada, é a muller que desempeña o cargo de maior rango nas organizacións agrarias en España. Sánchez Iravedra está á fronte de Embutidos Suarna, unha empresa familiar de Navia de Suarna dedicada á elaboración artesanal de produtos cárnicoos que compaxina coa xestión dun supermercado na localidade; tras o falecemento do seu marido asumiu a dirección dos negocios, que manteñen actividade económica e emprego feminino no medio rural. Raquel García traballa na área comercial de produtos frescos de Vegalsa-Eroski, desde onde participa na conexión entre os produtores e a distribución alimentaria.
Recoñecementos e actuacións
A xornada tamén servirá para recoñecer o traballo de distintas mulleres e contará con música e teatro. Actuará a regueifeira de Bergantiños Lupe Blanco, improvisadora que, a través do proxecto Regueifandopolavida en redes sociais, deu visibilidade a esta arte en toda Galicia e participou en festivais dentro e fóra de España. Tras unha degustación de produtos da terra, actuarán as pandereteiras de A Volta do Agro.
Fonte: Deputación de Lugo
