Ferrol acolle o 3 e 4 de outubro o I Torneo Internacional de baloncesto en cadeira de rodas

O concelleiro de Deportes de Ferrol, Ricardo Aldrey, e a presidenta de Basketmi, Gemma Alonso, presentaron o I Torneo Internacional Cidade de Ferrol de baloncesto en cadeira de rodas, que se celebrará os 3 e 4 de outubro no pavillón do Ensanche. A competición está organizada polo club en colaboración co Concello, e na presentación tamén estiveron a adestradora do equipo, Paula Vidal, e a xogadora de Basketmi Lourdes Freire.

Catro equipos participan neste primeiro campionato: o anfitrión Basketmi Ferrol, xunto aos portugueses APD Lisboa, APD Braga BCR e FC Porto Sports. A competición disputarase en sábado e domingo co seguinte calendario: o sábado ás 16:00 horas enfrontaranse APD Braga BCR e FC Porto Sports, mentres que ás 18:30 horas o Basketmi Ferrol medirase ao APD Lisboa. O domingo, a semifinal está programada ás 10:00 horas e a final ás 12:00 horas.

Segundo o Concello, o torneo nace cunha dobre vocación: ofrecer ao público de Ferrol un espectáculo deportivo de calidade e converter o deporte nunha ferramenta para avanzar na inclusión, na igualdade de oportunidades e na visibilidade do deporte adaptado. Entre os seus obxectivos figura tamén converterse nunha cita de referencia para o baloncesto en cadeira de rodas e incorporar Ferrol ao calendario de encontros internacionais desta modalidade, como cidade aberta á celebración de eventos deportivos inclusivos.

O concelleiro Ricardo Aldrey subliñou que «Ferrol volve acoller nas súas instalacións un evento de primeiro nivel deportivo, neste caso de baloncesto en cadeira de rodas, o que reafirma que somos unha cidade internacional neste deporte». Pola súa banda, a presidenta do club mostrou a ilusión de Basketmi por poñer en marcha esta iniciativa que «queremos manter no tempo» e que serve para «dar a coñecer este deporte, polo que invitamos a toda a cidadanía a que estean ao noso lado neste torneo que vai ser un espectáculo».

A adestradora Paula Vidal e a xogadora Lourdes Freire subscribiron as palabras da presidenta do club e engadiron que será unha boa oportunidade para ver o proxecto renovado do Basketmi para esta tempada.