O programa Lugo de corazón a corazón levará información e formación sobre saúde cardiovascular a persoas de 16 concellos da provincia. A iniciativa, promovida pola Asociación Lucense de Cardioloxía (ACARLU), conta cunha subvención nominativa de 8.217,50 euros da Deputación de Lugo, achega que se formalizou este venres coa sinatura do convenio entre a presidenta provincial, Carmela López, e o responsable da asociación, Francisco Villanueva.
O proxecto busca facilitar o acceso a coñecementos e ferramentas de prevención e autocoidado tamén ás persoas que viven fóra dos grandes núcleos urbanos. A programación inclúe charlas e coloquios sobre saúde cardiovascular, alimentación, medicación, sinais de alerta e hábitos saudables, así como formación en reanimación cardiopulmonar (RCP) e utilización de desfibriladores.
Estas actividades complementanse con actividades físicas adaptadas, camiñadas e espazos de apoio e intercambio de experiencias entre persoas que viven ou viviron situacións cardiovasculares. O programa incorpora o modelo de acompañamento de enfermo a enfermo, no que persoas con experiencia propia contribúen ao apoio e á educación de outras persoas afectadas.
En total desenvolveranse 16 intervencións presenciais a partir deste mes e até a primavera en diferentes concellos da provincia. A veciñanza de A Pontenova, Guitiriz, Navia de Suarna, Bóveda, Antas de Ulla, Pedrafita do Cebreiro, Samos, Foz, O Vicedo, Monforte de Lemos, Muras, Cervantes, Vilalba, Ribas de Sil, Trabada e Barreiros poderá aprender a través desta iniciativa.
Trala sinatura do convenio, a presidenta e o responsable da asociación baixaron á mesa informativa que este venres mantén o colectivo na praza de San Marcos.
Ademais da colaboración con ACARLU, a Deputación está a preparar a renovación da formación en cardioprotección para o persoal da institución. Así mesmo, ultima un informe sobre os medios dos que dispoñen os 67 concellos da provincia neste ámbito, co fin de axudalos a equiparse e formarse.
Claves
- Subvención nominativa de 8.217,50 euros da Deputación de Lugo ao proxecto, promovido por ACARLU.
- 16 intervencións presenciais que se desenvolverán a partir deste mes e até a primavera.
- Concellos incluídos: A Pontenova, Guitiriz, Navia de Suarna, Bóveda, Antas de Ulla, Pedrafita do Cebreiro, Samos, Foz, O Vicedo, Monforte de Lemos, Muras, Cervantes, Vilalba, Ribas de Sil, Trabada e Barreiros.
- Actividades: charlas e coloquios sobre saúde cardiovascular, alimentación, medicación, sinais de alerta e hábitos saudables; formación en RCP e uso de desfibriladores; actividades físicas adaptadas, camiñadas e espazos de apoio.
Fonte: Deputación de Lugo
