A Deputación de Lugo entregou os diplomas acreditativos a 21 axentes da Policía Local da provincia que realizaron o curso «Intervención Policial con Mobilidade Eléctrica Lixeira Urbana», unha acción formativa ofrecida pola institución provincial dentro do seu Plan Agrupado de Formación Continua.
A presidenta da Deputación, Carmela López, xunto ao deputado de Formación, Ensino e Economía do Coñecemento, Miguel Fernández, fixo entrega dos títulos este venres no Salón de Actos do Pazo de San Marcos. No curso participaron axentes procedentes na súa maioría de Lugo, pero tamén de Ribadeo, Foz e Monforte de Lemos.
A acción formativa, homologada pola AGASP (Academia Galega de Seguridade Pública), tivo unha duración de 24 horas e celebrouse os días 9, 10 e 11 de xuño nas aulas de formación da Policía Local de Lugo. A presidenta felicitou a unha representación dos participantes por completar esta formación e agradeceu o seu compromiso coa aprendizaxe continua.
«Desde a Deputación apostamos cada ano pola formación da Policía Local porque sabemos da importancia de contar con profesionais preparados, actualizados e capaces de responder aos retos que xorden no exercicio das súas funcións», declarou Carmela López, que destacou ademais o papel destes efectivos: «Sodes un servizo fundamental pola vosa proximidade á cidadanía e polo traballo que desenvolvedes cada día en favor da seguranza, a convivencia e a atención ás necesidades das veciñas e veciños», sinalou.
Parte dos diplomas entregaranse nos próximos días aos axentes que non puideron acudir ao Pazo de San Marcos, porque este fin de semana forman parte do dispositivo de seguranza despregado polo Rally San Froilán.
Contidos do curso
O curso centrouse na actualización de coñecementos sobre a normativa aplicable aos vehículos de mobilidade persoal (VMP) e aos vehículos persoais lixeiros (VPL), co obxectivo de dotar aos axentes de criterios técnicos e ferramentas prácticas para intervir ante os novos escenarios da mobilidade urbana.
Entre os contidos figuraron a análise da Lei 5/2025, de modificación da normativa sobre responsabilidade civil e seguro na circulación de vehículos a motor, e do Real decreto 52/2026, que modifica o Regulamento xeral de vehículos.
A formación incluíu tamén o estudo das características técnicas dos VMP, os criterios para clasificar os distintos tipos de vehículos, os requisitos de identificación e certificación, os procedementos de inscrición no Rexistro Nacional de Vehículos e o control das obrigas de aseguramento.
Os participantes afondaron ademais nos procedementos de actuación policial ante posibles infraccións, desde a formulación de denuncias administrativas ata as posibles responsabilidade penais, así como nas medidas provisionais que poden adoptar os axentes en función da gravidade dos feitos, incluídas a inmovilización e a retirada dos vehículos. O programa completouse coa análise de casos prácticos relacionados coa intervención policial.
Fonte: Deputación de Lugo
