A presidenta da Deputación de Lugo, Carmela López, asinou esta semana na sala de xuntas do Pazo de San Marcos a venda dunha parcela no polígono industrial de Cospeito, tamén coñecido como parque empresarial de Feira do Monte. A transacción formalizouse por 39.000 euros.
Concretamente, a institución provincial vendeu a parcela número 22 ao particular Marcos Fernández Veiga, que porá en marcha un taller de reparación de tractores tras máis de 30 anos de experiencia no sector. Fernández Veiga, que ata agora desenvolvera a súa actividade profesional como empregado por conta allea en Lugo, dá agora o paso de converterse en emprendedor no medio rural e poñer en marcha o seu propio negocio en Cospeito.
O novo taller estará situado a apenas dous quilómetros do seu domicilio, polo que a proximidade foi un dos factores determinantes para apostar por este parque empresarial e desenvolver alí a súa actividade profesional, segundo recolle o documento da Deputación.
Quedan 15 parcelas dispoñibles en Cospeito
Trala operación, quedan dispoñibles 15 parcelas das 24 que conforman o parque, situado moi preto da Autovía A-6, o que facilita a conexión co resto da provincia. O polígono conta cunha superficie total de 56.726 metros cadrados e as parcelas dispoñibles van desde os 800 ata os 1.300 metros cadrados.
O prezo establecido é de 39 euros por metro cadrado e a institución provincial ofrece facilidades de pagamento mediante financiación.
Dispoñibilidade no resto de polígonos
No resto dos parques industriais que constrúe e xestiona a Deputación de Lugo, a dispoñibilidade é de 9 parcelas no polígono de Baleira, das 27 existentes; 37 parcelas dispoñibles dun total de 51 en Castroverde; 24 en Friol das 55 coas que conta; en Ourol hai 2 á venda dun total de 3; 13 das 19 que había inicialmente no de Paradela; e 1 parcela á venda dun total de 12 en Begonte. No de Chantada, xa están todas vendidas.
Claves
- Prezo no polígono de Cospeito: 39 euros por metro cadrado, con facilidades de pagamento mediante financiación.
- Parcelas dispoñibles en Cospeito: desde os 800 ata os 1.300 metros cadrados.
- As persoas interesadas en obter máis información sobre a adquisición de parcelas poden poñerse en contacto co Servizo de Patrimonio da Deputación de Lugo.
Fonte: Deputación de Lugo
