A Deputación de Pontevedra participará no Shooting Locations Marketplace, un encontro internacional da industria audiovisual que se celebra entre o 14 e o 15 de outubro na Feira de Valladolid. O obxectivo deste evento é conectar destinos de rodaxes con profesionais do sector como localizadores, produtores e directores creativos.
A institución provincial acudirá ao encontro a través da Rías Baixas Film Commission, co fin de difundir a oferta das Rías Baixas como plató de cinema. Xa están pechadas reunións con localizadores e produtores de empresas de relevancia internacional como 20th Century Studios, HBO, Universal Pictures, See-Saw Films, Focus Features, Atresmedia Cine, La Terraza Films, Fable Pictures, Film Base Berlin, Producciones Mandarina, Point Prod, Zolba Productions ou Matiné.
Entre as pezas audiovisuais nas que traballaron estas compañías figuran Avatar, Alien, Xogo de Tronos, Oppenheimer, Jurassic Park, O discurso do rei, Lost in Translation, La isla mínima, As leis da fronteira, Wild Rose, Killing Eve, Winter Palace, Von Fock ou Terra Vil.
A todas estas empresas ofreceráselles a guía de rodaxe e presentaráselles os lugares máis atractivos da provincia como destino apropiado para grandes producións audiovisuais. Ademais, facilitaráselles información relativa ás axudas existentes ao sector audiovisual para rodaxes en Galicia e na provincia de Pontevedra.
Segundo recolle o documento oficial, no Shooting Locations Marketplace a Deputación de Pontevedra pretende establecer contactos directos con localizadores, runners, produtores, estudos de produción, directores e outros perfís creativos e técnicos, co obxectivo de atraer novos rodaxes e proxectos audiovisuais ao territorio.
A institución provincial tamén divulgará localizacións singulares e recursos técnicos ou institucionais dispoñibles para materializar estas producións, e trasladará o seu compromiso coa industria cultural e audiovisual, así como co desenvolvemento económico a través do audiovisual. Esta participación éntrase no obxectivo da Deputación de difundir os múltiples atractivos turísticos da provincia.
Fonte: Deputación de Pontevedra
