A exposición que lembra que Galicia «ten catro estacións»

Edu Valiña ante a súa instalación dando detalles ao conselleiro de Cultura / Rocío Cibes

«Aínda que ás veces parece que en Galicia só temos unha estación, máis logo do inicio deste 2026 con tanta choiva, esta exposición lémbranos que temos catro estacións». Así empezou este xoves o conselleiro de Cultura, José López Campos, a súa intervención en Santiago na apertura da mostra As estacións do ano na arte galega dos séculos XX e XXI, aberta no Museo Centro Gaiás (2ª planta), e de entrada libre.

Grandes nomes da arte galega

Tras nacer o ano en Galicia co xaneiro máis escuro dos últimos 30 anos, convén lembrar que cada 12 meses a paisaxe ofrece catro estacións.

E así o subliña esta recompilación de algo máis de 80 pezas con protagonismo de grandes personalidades do mellor arte da historia en Galicia: Castelao, Eugenio Granell, Laxeiro, María Antonia Dans, Manuel Abelenda, Luis Seoane, Manuel Vilariño, Francisco Leiro, Antón Lamazares, Urbano Lugrís, Manolo Paz, Berta Cáccamo ou Menchu Lamas, entre moitos outros participantes.

Conviven con outros nomes do arte contemporáneo como Sergio Marey ou Eduardo Valiña, agrupados baixo a visión de Mónica Alonso, comisaria que aporta ao espazo expositivo unha singularidade baseada nun significativo uso da cor en sintonía co outono, inverno, primavera e verán.

Unha das pezas durante a visita posterior do conselleiro de Cultura tras o acto inaugural. / Rocío Cibes

Obras e artistas destacados

«Esa é a Galicia Atlántica, unha Galicia universal… Para facer esa foto tiven que esperar a que a marea quedase moi baixa». Esa frase do coruñés Manuel Vilariño, Premio Nacional de Fotografía en 2007, foi unha das moitas que onte salpicaron a visita coral posterior ao acto de apertura, que xuntou a cerca de 200 persoas no Gaiás e onde Vilariño improvisou esa sentida explicación da foto en gran formato que aporta á mostra.

É unha estampa en branco e negro da famosa praia de area negra da zona de Cariño/Cedeira. «Está preto da Serra da Capelada, unha zona moi bonita para facer sendeirismo», indica a este xornal outro dos artistas presentes na exposición, Juan Lesta, un referente en Galicia á hora de falar de videoinstalacións.

Outra das pezas que fixo deter a comitiva inaugural está asinada por Edu Valiña, lucense afincado en Compostela e autor de Esfollarse (2000-2025), peza na que un mar de follas de millo tanto crea un vestido como unha esquina feita co prado de Sarria e do Páramo (o material empregado procede de alí) trasladado ata a capital galega; instalación que se completa coa música creada polo teense Mondra (Martín Mondragón), un nome relevante dentro da escena galega neo-folk.

Visitas inmersivas e actividades

Mónica Alonso indicou na súa presentación que en datas por confirmar se fará un ciclo de visitas de carácter inmersivo onde as persoas participantes vestirán batas monocromas para sentir de modo singular o contraste coas paletas de cor das obras agrupadas en sintonía coa primavera e o verán, e outras de alma invernal e outonal.

No percorrido entre as pezas hai dúas paradas que reforzan o simbolismo: «Hai dúas cabinas, unha de calor e outra de frío», explicou a comisaria.