CONTIDO:

O pasado ano abriu as súas portas en Chantada La Guara Bar, un local centrado na cociña venezolana e no que os veciños dese país, de Colombia ou da República Dominicana se reencontraron con arepas, empanadas, tequeños, pabellón, salchipapas e outras receitas tradicionais e exquisitas.

En La Guara a poboación galega tamén se familiarizou e se namorou dunha gastronomía que destaca polo seu sabor e variedade.

Un proxecto familiar con raíces venezolanas

La Guara é un establecemento familiar con Elsy Mendoza e Cristo Rey Orozco ao fronte.

Elsy é natural de Barquisimeto, unha localidade venezolana cuxos habitantes reciben o alcume de ‘guaros’, de aí que escollese o nome de La Guara para o local.

A parella chegou a Chantada en 2024 e pouco máis dun ano despois puxo en marcha este establecemento hostaleiro.

Oferta gastronómica e ambiente

La Guara é un bar ao uso, no que tomar un café, unha cervexa ou un viño. Ademais das marcas convencionais, destacan outras como a malta Maltín Polar.

Tamén é coñecido este local polos seus chupitos.

A oferta gastronómica combina os pratos propios de Venezuela como arepas, pabellón, empanadas, patacón ou unha sopa tradicional con outras propostas como o polo asado, unha ampla variedade de hamburguesas, perritos quentes ou pratos á grella.

Especialidades venezolanas e novidades

Explica Elsy que, por exemplo, «as empanadas son as propias venezolanas, diferentes das galegas, e temos unha ampla variedade de recheos. É o caso da empanada pelúa (con carne desmechada), de xamón e queixo, de pabellón, de polo con queixo…».

Entre as especialidades criollas, unha das últimas incorporacións son os tequeños, con fariña de trigo e queixo branco.

As deliciosas propostas de La Guara pódense degustar no establecemento ou pedir para levar.

Presenza na Feira do Viño de Chantada

De cara á Feira do Viño de Chantada, que se celebra do 6 ao 8 na vila do Asma, e co obxectivo de dar a coñecer os seus pratos ao gran público, La Guara conta con permiso municipal para instalar un posto de venda de comida na zona do ferial.