O campo da festa de San Lázaro, no barrio lucense de A Ponte, acolleu a celebración da cuarta edición da Festa da Troita con Xamón, que reuniu a máis de 500 comensais procedentes das parroquias ribeirás do Miño, do Rato e do Mera.
A cita, de exaltación gastronómica e de confraternidade, está promovida pola federación veciñal Lucus Augusti e conta co apoio da Deputación de Lugo. Na xornada participaron os deputados provinciais Miguel Fernández, Pablo Rivera e Pilar García Porto, acompañados polo presidente da federación veciñal, Jesús Vázquez, entidade organizadora do evento, así como outras autoridades.
A festa serviu para recoñecer o traballo a favor da conservación dos ríos que realizan os veciños das parroquias do concello de Lugo, tanto das que dan á beira do Miño como das que viven preto dos seus afluentes. Miguel Fernández destacou na súa intervención o traballo que fan os veciños no coidado dos ríos e na conservación do territorio. «Vós sodes os que coidades as marxes dos ríos, os que respectades a contorna e os que mantedes vivo o noso territorio», sinalou o deputado, quen engadiu: «Hoxe non é unha feira máis; é un gran día de confraternidade para atoparnos, compartir e fortalecer lazos arredor dunha mesa. E imos facelo poñendo en valor o mellor da nosa gastronomía de proximidade».
4.000 racións de troitas de Ribeira de Piquín
O encontro contou coa asistencia de máis de 500 comensais provenientes das 22 parroquias lucenses que lindan co río Miño e cos seus afluentes, os ríos Rato e Mera. Durante o encontro degustáronse produtos de proximidade: servíronse unhas 4.000 racións de troitas de Ribeira de Piquín criadas no río Eo, acompañadas con xamón de Torre de Núñez, queixo da denominación de orixe San Simón da Costa e pan de Antas de Ulla.
A reunión tamén serviu para homenaxear a 12 persoas que este ano destacaron pola súa labor e traballo nalgunha das parroquias participantes, que foron distinguidas co premio «Amigo/a do rural». Os galardóns foron entregados ao remate da comida.
Fonte: Deputación de Lugo
