A Policía Local de Lugo detivo a un individuo como presunto autor dun intento de roubo con arma branca, segundo consta no informe de actuacións publicado polo Concello de Lugo con data de luns, 19 de outubro de 2026.
Os feitos ocorreron ás 4:00 horas do sábado, cando un indicativo do Grupo Operativo Nocturno realizaba patrulla preventiva pola rúa Conde Pallares e observou a dous mozos que camiñaban tras outro home. Ao ver á policía, os mozos avisaron: «coidado con ese home, intentou roubar e leva unha navalla». Os axentes viron entón como o individuo lanzaba unha navalla baixo o vehículo policial, que foi intervida nese momento.
De forma simultánea, a Sala do 092 informou aos axentes de que se recibiran avisos por un intento de roubo nun local da Praza Maior, coincidindo a descrición do presunto autor coa do home que estaba a ser identificado. Segundo o relato, o individuo foi visto polos dous mozos —traballadores de seguridade de locais de ocio nocturno da zona— cando levantaba a reixa metálica dun establecemento de hostalaría e intentaba abrir a porta interior. Ao tratar de impedir que abandonase o lugar, sacou unha navalla e ameazounos con «raialos». O detido foi trasladado a dependencias policiais para a tramitación de dilixencias.
O mesmo informe recolle unha forzadura de cerradura nun edificio da rúa do Prado. Ás 10:30 horas do sábado, a Sala do 092 recibiu aviso dun individuo que causaba molestias nos rechalos do inmoble, ao que accederA forzando a cerradura cunha peza metálica. O mozo, que xa non estaba no lugar, foi localizado e identificado, e os afectados manifestaron a súa intención de presentar denuncia, xa que a cerradura resultou danada e o edificio conta con gravacións de cámaras.
Entre as actuacións de auxilio á cidadanía destacan as da xornada do venres: unha muller que caeu sen causa aparente na rúa Lamas de Prado foi atendida con primeiros auxilios e trasladada a un centro hospitalario; unha axente fóra de servizo apartou da calzada da Ronda Norte a un home incapaz de manter unha conversa coherente, que levaba pulseira de ingreso hospitalario e tamén foi trasladado en ambulancia; e na Avenida da Coruña asistíuselle a un home de 80 anos incapaz de manterse en pé, con espasmos e xestos de dor.
Ás 1:50 horas do domingo, o Grupo Operativo Nocturno localizou no parque Rosalía de Castro a un menor de 17 anos do que a súa nai non sabía nada desde as 19:00 horas, entregándollo xunto a outro menor que o acompañaba. Ademais, denunciouselle a tres persoas por venda ambulante sen autorización no Parque da Milagrosa e localizouse ao propietario dun can abandonado na rúa San Roque, atado a unha árbore durante máis dunha hora segundo varios transeúntes.
Fonte: Concello de Lugo
