O proxecto SIM4UE ten como obxectivo xeral mellorar as competencias asistenciais técnicas e non técnicas dos profesionais sanitarios mediante un Programa Integral de Simulación Clínica que promova unha atención máis segura e eficiente. A Universidade de Santiago de Compostela forma parte do consorcio a través da súa Facultade de Enfermaría.
O proxecto está cofinanciado pola Unión Europea e aprobado no marco do Programa Interreg VI-A España-Portugal (POCTEP) 2021-2027, Prioridade P5. O consorcio acaba de desenvolver a reunión de lanzamento do proxecto, co que se aspira a reducir a variabilidade clínica, fortalecer os equipos asistenciais e mellorar a calidade da atención.
En consonancia co obxectivo específico 4.5 do POCTEP, o proxecto promove velar pola igualdade de acceso á asistencia sanitaria e reforzar a resiliencia dos sistemas sanitarios, en particular a atención primaria, así como fomentar a transición da asistencia institucional á asistencia nos ámbitos familiar e local.
O papel da USC
A USC coordina e lidera as actividades relativas ao Programa integral de Simulación clínica en emerxencias pediátricas e obstétricas, así como a avaliación integral, a análise de impacto e a difusión de resultados da formación integral en simulación clínica nas urxencias e emerxencias intra e extrahospitalarias, contribuíndo á análise global do proxecto.
O resto de beneficiarios do consorcio son a Xunta de Andalucía, a Fundación Pública Andaluza Progreso y Salud, o Hospital Universitario Virgen del Rocío e a Fundación Pública Andaluza Gestión e Investigación Salud, ademais do Centro Hospitalar de Trás-os-Montes e Alto Douro, E.P.E. (Portugal) e o Centro hospitalar e universitário de Coimbra, E.P.E. (Portugal).
A reunión de lanzamento tivo lugar na Consellería de Presidencia de Sanidade e Emerxencias da Xunta de Andalucía e contou coa participación de representantes institucionais da Xunta de Andalucía, da Dirección xeral de fondos Europeos do Estado e do Programa Interreg da Comisión Europea.
Nunha segunda parte da xornada, os diferentes beneficiarios do proxecto e os seus equipos de traballo mantiveron unha reunión de coordinación na que se estableceron as bases para a colaboración entre as entidades participantes, os circuitos de comunicación, o plan de traballo e os procedementos de xestión financeira do proxecto.
