A salón de sesións da Casa do Concello de Lugo acolleu este luns a presentación de Lugopoética 2026, unha publicación que recolle os contidos das conversas poéticas celebradas na sede da UNED en Lugo durante o primeiro semestre deste ano, baixo a dirección do profesor e poeta Xosé Carlos Ulloa.
Candia ratificou o apoio do Concello a esta iniciativa, entendendo que a promoción da literatura e da poesía forma parte do compromiso institucional coa cultura galega. Neste sentido, puxo en valor a importancia de contar con espazos que permitan dar a coñecer o traballo das persoas creadoras e achegar a poesía á cidadanía.
Lugopoética naceu co obxectivo de dar visibilidade á ampla tradición poética lucense e achegar ao público tanto voces consolidadas como novos autores e autoras que destacan pola súa creación literaria en galego. Esta nova edición conta coa participación de doce poetas procedentes de Chantada, Castroverde, Sarria, Lugo, Paradela, Guitiriz, Cospeito e Corme.
As persoas asistentes ao acto recibiron un exemplar do libro. Ademais das autoridades, interviñeron o director dos encontros, Xosé Carlos Ulloa; o presidente de Egeria, Xulio Xiz, e os poetas Diana Varela Puñal, Chelo Gayoso, Alicia Fernández, Elena Pérez, Eduardo Carreira, Ánxela Gracián, Anamar Fraga, Mariluz Balsa, Xosé Lois García e Ramón Rodríguez Porto.
A presentación contou tamén co acompanhamento musical a frauta traveseira de Angélica Darriba Fernández, de 13 anos, integrante das Escolas Músico Crisanto e da Banda Sons e Soños, que xa participou coa súa música en varios destes encontros poéticos.
Lugopoética conta co patrocinio do Concello de Lugo, a Xunta de Galicia e a UNED, e o acto estivo organizado por Egeria e Brandán Comunicación.
Fonte: Concello de Lugo
