"Pensaba que ser nova ía ser contraproducente para min e que ao mellor os alumnos non me ían ter respecto, pero míroos e xa saben que teñen que calar", admite María Lage. Chegar a ser profesora cando se acaba de acadar o cuarto de século é unha tarefa moi difícil e que se ve en poucas ocasións.

Con só 26 anos, non só sacou o grao en Química, senón que tamén logrou sacar a oposición e conseguir praza no IES Muralla Romana de Lugo, a súa cidade natal.

Vocación e cambio de rumbo

O camiño para chegar a ensinar física e química a compañeiros de xeración, xa que os Z chegan ata o ano 2012, tiña outra visión inicial. "Ao principio quería ser mestra de matemáticas, pero en cuarto da ESO deixaron de gustarme, sobre todo ao ver que na carreira eran moi diferentes ás do instituto".

Así, ao final do seu periplo na secundaria chegou a química á súa vida a pesar de que "antes non me gustaba".

Na súa época de estudante, logrou varias bolsas e comezou o máster de investigación. Sobre todo, porque "os profesores a partir de terceiro contactan cos alumnos que máis lles gustaron nas prácticas para que se unan ao seu grupo de traballo".

Pero Lage axiña se decatou de que "non ía ser o meu", polo que volveu á súa idea de encamiñar o seu camiño profesional cara ao ensino.

O reto das oposicións e a aula

Tras rematar, chegou a preparación da oposición, unha fórmula que cada vez máis mozos preparan para conseguir un traballo. María Lage declara que se pechou "todo un ano para preparala, estiven sen vida social ningunha".

Aínda que foi unha época dura, tivo o apoio da súa irmá, que tamén as preparaba. As súas claves foron "a academia, porque tiña todo moi ben organizado de cara a chegar con todo listo ao día do exame e o traballo persoal".

Pero tamén indica que cre que para un proceso como este é importante "non ter mala sorte".

Tras sentir unha gran "baixada a mínimos do meu nivel de estrés", chegaba a hora de entrar por primeira vez como profesora nun centro educativo. O seu primeiro destino era na casa, pero ao inicio pensaba que sería "contraproducente" a súa mocidade, sumado a que "eu non son grande nin teño un vozarrón", algo do que pronto se decataría de que non era así.

Cambios xeracionais e preocupacións sociais

Desde o comezo, percibiu grandes "cambios xeracionais", aínda que ela non quere comparalos coa súa experiencia porque "nunca tiven a ningún profesor novo ata segundo de Bacharelato".

Aínda así, afirma que "preguntan e comentan cousas que eu nunca lle diría a un profesor". Fano sobre todo de "temas superficiais como a vestimenta ou o amor", pero tamén indica que "hai unha gran parte que me pregunta que fixen para chegar a este punto e que estudei".

Aínda que tamén se decatou dun tema de profunda gravidade, como é o auxe das ideoloxías de extrema dereita nos máis novos. Ela apunta que no centro puideron constatar que "hai alumnos que non tocan o que se lles pide coa frauta, pero en cambio saben de memoria a partitura do Cara al Sol".

Lage pensa que "non son conscientes do que están tocando, pero as redes sociais fan moito dano" e engade que "hai unha corrente de apoxeo da extrema dereita que non é normal e os adolescentes están moi influenciados, sobre todo os nenos".

Para que os máis pequenos poidan evitar caer neste tipo de mensaxes, pon o foco en que é importante que haxa unha "aprendizaxe en todas as persoas independentemente da súa idade".

Sinala que "por moito esforzo que fagamos nos centros educativos en facerlles ver que mensaxes son certas ou falsas, se na casa non se sabe discernir e se mestura todo, non servirá de nada".

María Lage percibe que a principal preocupación da xente da súa xeración é a vivenda, aínda que ela ten a sorte de poder esquivala polo de agora. Indica que "ao poder exercer a miña profesión en Lugo, teño unha situación privilexiada na que podo seguir vivindo na casa dos meus pais".

Isto permítelle poder "aforrar para que máis adiante poida independizarme dunha forma máis segura". Indica que ve que moita xente da súa idade "está nunha situación na que traballando ou ben non teñen para poder afrontar a entrada dun piso ou ben se consegue vivir en alugueiro, xa pouco máis pode facer".

Aínda que tamén sinala que percibe que "hai cousas nas que moita xente gasta que poderían prescindir para conseguir un maior aforro".

Outro dos cambios que notou foi a sociedade despois da pandemia. Lage afirma que ve unha socialización "moito máis frecuente nas redes sociais", aínda que si que percibe que, no centro, moitos nenos "non levan o seu teléfono, pero teño unha visión limitada".

A súa experiencia durante a Covid-19 fíxolle "deixar de saír de noite porque pensaba que ese era o noso momento", aínda que se lamenta máis de "perder coñecementos a nivel académico".

Sobre a Xeración Z, pon en valor dúas cuestións. "Creo que valoramos moito máis a calidade de vida e temos máis en conta pasar tempo coas persoas que realmente queremos" e tamén que "temos unha maior empatía que as xeracións anteriores".

O galego entre a mocidade e a Xeración Z

Unha das situacións das que se deu conta María Lage desde que iniciou a súa carreira profesional como docente é do baixo uso do galego por parte de algúns sectores do alumnado. Incluso afirmou que algúns senten "animadversión" a usar a lingua propia da comunidade autónoma.

Aínda que na súa materia a docencia está posta en castelán, Lage é galegofalante e afirma que en ocasións "sáeme natural comunicarme en galego". Pero non ve nos nenos esa intención de falar no idioma, incluso indica que "algúns é coma se sentisen unha certa animadversión que eu non son capaz de entender".

A Xeración Z está iniciando un novo auxe tanto do idioma como da cultura galega. Onde máis o notou a profesora lucense é cando foi a Santiago de Compostela a comezar os seus estudos en química.

"Cando cheguei, fun vendo que moitos compañeiros que eran castelanfalantes querían mudar e converterse en neofalantes", ao que engade que "oxalá poidamos introducirllo aos cativos para que tamén queiran empregalo".

Segundo os últimos datos do Instituto Galego de Estatística (IGE), o 55 por cento dos habitantes na provincia de Lugo usan máis o galego ca o castelán, sendo un 30,84 o que se comunica sempre en galego.

Pola contra, na franxa de idade dos 5 aos 14 anos, o dato baixa ata o 33 por cento, aínda que é máis esperanzador ca no resto de provincias.