Quen é quen no póker de marcas de Inditex

Unha tenda Bershka en Berlín, Alemaña / Inditex

O grupo en ningún caso exprésao como tal, pero o proceso de transformación que está vivindo Zara é evidente. Peche de tendas pequenas, priorización de locais máis grandes e con moito máis espazo, reforma de establecementos emblema, estilo máis elegante e selecto dos locais, prendas sen alarma visible…

E xa se sabe que o que ocorra no buque insignia deste grupo (con 27.700 millóns de euros de facturación en 2024, aporta máis do 70% dos ingresos totais da compañía) é perfectamente extrapolable ao resto de marcas.

O universo Inditex: marcas e cifras

Pero, quen é quen no póker de enseas deste xigante español da moda? Ordenadas de máis a menos facturación anual, o universo Inditex complétano Bershka, Stradivarius, Pull&Bear, Massimo Dutti, Oysho e Lefties.

As dúas primeiras son, ademais de as de maior tamaño, tamén as que máis medraron no último exercicio con datos dispoñibles. De 2023 a 2024, Bershka, a cadea de moda máis urbana, extravagante e xove, elevou as súas vendas case un 12% ata situarse en arredor de 3.000 millóns de euros anuais, e Stradivarius, marca tamén dirixida a un público xove pero cun estilo máis casual e elegante, creceu máis dun 14% ata os 2.600 millóns.

Pull&Bear diríxese tamén a un cliente xove, de entre 18 e 35 anos, cun estilo urbano que se sitúa entre a oferta de Bershka e Stradivarius. Esta marca estaba en 2024 próxima aos 2.500 millóns de euros de ingresos anuais.

Massimo Dutti está pensada para un público máis adulto e cun poder adquisitivo medio-alto. É a marca máis sofisticada do universo Inditex, pero a penúltima en ingresos: 1.900 millóns de euros.

Oysho achega 830 millóns de euros ás arcas anuais de Inditex. Esta última marca, por certo, é outro pilar da estratexia de transformación do grupo, pois naceu como cadea de roupa interior, pero hai tres anos volcouse exclusivamente na roupa deportiva, vendo que era o que máis interesaba aos seus clientes.

Unha tenda Oysho nun centro comercial de Dubai / Inditex

O caso Lefties e a estratexia de baixo custo

Sobre Lefties non hai información na súa Memoria Anual de resultados, porque, financieramente, forma parte de Zara. A marca naceu como unha maneira de dar saída aos modelos de Zara que tiñan desperfectos ou que quedaran desfasados.

A palabra inglesa ‘Lefties’ podería traducirse como ‘Restiños’. Con todo, leva anos gañando moita notoriedade dentro do grupo, ata o punto de se converter nun xeito para combater directamente o avance de Primark ou Shein, pois móvese tamén na franxa do ‘baixo custo’.

A estratexia, sexa casual ou buscada, está a funcionar: as últimas contas depositadas no Rexistro Mercantil falan dun crecemento, en 2024, de máis do 17% (o máis importante entre o resto de marcas) ata rozar os 650 millóns de euros de ingresos anuais.

Non é de estrañar, pois, que sexa outro dos puntos nos que Inditex queira apoiar a súa estratexia de crecemento nestes tempos algo máis convulsos.

Para mostra, que crearan un Lefties Home (brazo para produtos do fogar que só tiña Zara), que chegaran a un acordo coa marca Create para vender electrodomésticos dentro da súa oferta, ou qu