María Regina Carreira López, doutora en Estudos Culturais pola USC e en Lingüística pola Université Rennes 2 (Francia), recolleu este venres, 23 de outubro de 2026, na Facultade de Humanidades de Lugo o I Premio en Xestión Cultural ‘Ana Goy Diz’, que outorga a Cátedra Institucional de Xestión Cultural da USC.
A cátedra está dirixida polos docentes Gonzalo Francisco Fernández Suárez e Mª Dolores Fernández Tilve e conta co apoio da Consellería de Cultura, Lingua e Xuventude da Xunta de Galicia.
O premio fóralle concedido pola súa tese de doutoramento ‘El rastro de la identidad: la representación de las migraciones atlánticas por medio de la indexación semántica de corpus textuales en documentos de archivo (1776-1939)’, defendida no programa de doutoramento en Estudos Culturais: Memoria, Identidade, Territorio e Linguaxe, coa cualificación de sobresaínte cum laude e Mención Internacional.
Un recoñecemento á excelencia científica
Regina Carreira é especialista en análise semántica, identidade e xestión do patrimonio documental, e avaliadora experta para a Comisión Europea en programas marco de impacto social e creativo. No acto, a codirectora da cátedra, a profesora Fernández Tilve, destacou que o traballo premiado é un exemplo «da excelencia científica, caracterizada polo rigor, a orixinalidade, a honestidade e a integridade».
O acto de entrega estivo presidido polo vicerrector de Innovación e Transferencia do Coñecemento da USC, Marcelino Maneiro, e contou cunha nutrida representación de autoridades académicas, políticas e civís, especialmente do ámbito cultural. Entre os asistentes estiveron o director xeral de Patrimonio Cultural da Xunta de Galicia, a alcaldesa do Concello de Lugo, a subdelegada do Goberno en Lugo, a vicepresidenta primeira do Parlamento de Galicia, o secretario xeral de Universidades, a presidenta da Academia Galega do Audiovisual e os directores do Instituto de Estudos Galegos Padre Sarmiento e do Museo Catedralicio de Lugo.
Segundo explicou Fernández Tilve, co premio búscase promover, recoñecer e difundir na sociedade galega estudos inéditos no campo da xestión cultural, co fin de contribuír á promoción da investigación e da innovación no sector cultural en xeral e no patrimonio en particular. O galardón pretende ademais honrar a memoria e o «indiscutible legado» da finada Ana Goy Diz, catedrática de Historia da Arte da USC, académica de Belas Artes e representante en Galicia do Icomos, a quen a profesora definiu como unha investigadora e difusora «e dinamizadora incansable do patrimonio cultural da provincia e da cidade que acolle esta cátedra».
O acto tivo lugar na sala Ana Goy Diz da Facultade de Humanidades de Lugo.
