A declaración do alumnado de A Pedra no 8-M: "As voces do futuro" / Gonzalo Núñez

Mañá é 8 de marzo e conmemórase o Día Internacional da Muller. Pero os actos de celebración xa comezaron este venres en Bueu e Moaña e O Morrazo estivo representado no acto de homenaxe celebrado na Subdelegación do Goberno en Pontevedra, para recoñecer o traballo dos Centros de Información ás Mulleres (CIM) da provincia.

Cando o reloxo do Concello de Bueu marcaba as doce do mediodía xa facía tempo que diante do consistorio se concentraban escolares de A Pedra e do Virxe Milagrosa, persoal do cadro municipal e veciñanza en xeral para acudir á apertura dos actos do 8-M no municipio. Foi a través dunha declaración conmemorativa elaborada e lida polo alumnado de 6º de Primaria do colexio de A Pedra. «Pode que alguén pense que aínda somos pequenos, pero temos algo moi grande: temos soños, ideas e temos dereito a un futuro xusto», proclamaron a través dun texto coral baixo o título de «As voces do futuro». Un futuro que aseguraban que «empeza hoxe». Un futuro que esixen que veña cos mesmos dereitos para homes e mulleres, que todas as persoas sexan tratadas por igual.

Un futuro non só con dereitos, tamén con compromisos. «Nós comprometémonos a facer un mundo mellor e a tratar ben e a respectar a todas as persoas; nós comprometémonos a loitar polos dereitos da muller; nós comprometémonos a respectar a todas as mulleres, sen importar o seu físico, a súa personalidade nin a que se dediquen; nós comprometémonos a respectar os gustos e maneira de vestir de cada persoa», expresaron. Uns dereitos e uns compromisos que se poden resumir en «un mundo onde ser nena non marque límites, senón posibilidades; un mundo onde todas as persoas teñan as mesmas oportunidades, o mesmo respecto e a mesma liberdade». Unhas voces do futuro que dixeron ben alto e claro que «non somos só o futuro: somos o presente que aprende, que pensa e que actúa».

A lectura da declaración do colexio de A Pedra contou coa presenza de representantes de todos os partidos políticos da corporación de Bueu e antes de comezar o alcalde, Félix Juncal, interveu para recalcar que “temos unha xeración de mozos e mozas que vai interiorizando eses valores tan importantes das persoas, o que non está exento de desafíos, xa que cada vez que damos un paso para adiante parece que tamén retrocedemos”.

Homenaxe da Subdelegación do Goberno aos CIM / SGP

Quen non puido estar nesta ocasión neste acto foi a directora do CIM de Bueu, Montserrat González. Ela é tamén a presidenta da asociación que reúne as profesionais destes centros en Galicia, Asocim, e foi a encargada de recoller a esa mesma hora o recoñecemento brindado en Pontevedra pola Subdelegación do Goberno. Un acto no que o subdelegado, Abel Losada, condenou os «bombardeos testosterónicos e feminicidas» que asolan «este mundo covarde», un discurso que incluíu un rotundo «non á guerra!». Pola súa banda, Montserrat González alertou que «nos enfrontamos a novos tipos de violencia: no seu día foi a psicolóxica, despois a vicaria e agora xorde con forza a ciberviolencia».

A exposición de bordado tradicional, no Concello Vello de Moaña. / Gonzalo Núñez

A directora do CIM de Bueu e presidenta de Asocim concluíu cun sentido e emotivo agradecemento. «Este premio pertence a cada técnica, a cada asesora e, sobre todo, a cada muller que cruzou as nosas portas buscando apoio e atopou unha man tendida», afirmou.

A xornada de onte aínda incluíu unha cita máis en Bueu: a novena edición da Homenaxe Bueuesa Senlleira, que impulsa o Club Golfiños. Nesta ocasión o recoñecemento recaeu en Eva Bastón Graña, nada en 1981, natural do lugar de Xexide e actualmente asentada en Barcelona. Desde Golfiños destacan o seu traballo orientado á recuperación de variedades antigas de trigo e doutros cereais panificables. Na actualidade, ademais de dedicarse á elaboración de pans coa fermentación óptima, tamén traballa noutros oficios artesanais como a cestería ou a olería. Nesta homenaxe acompañouna alguén moi especial, a persoa que estreou as distincións de Bueuesa Senlleira de Golfiños: a poeta Míriam Ferradáns.

Homenaxe Bueuesa Senlleira de Golfiños polo 8-M / Gonzalo Núñez

En Moaña o protagonismo recaeu nas mulleres que manteñen con vida a arte do bordado artesanal co obxectivo de transmitilo ás futuras xeracións. Algunhas das súas obras poden verse nunha exposición inaugurada no Concello Vello e que aínda está aberta hoxe e mañá entre as 18.00 e as 20.00 horas. Varias das autoras son discípulas de Mercedes Barreiro en Vilariño. Os eventos trasladáronse despois ao local da Asociación de Mulleres onde Anabel Budiño protagonizou o monólogo «Sen guión». Seguiulle a música do Coro Chorima.

Monólogo de Anabel Budiño na Festa da Muller de Moaña. / Gonzalo Núñez

Hoxe a programación arrinca en Cangas co contacontos «Elas pintan moito», con música en directo, desde as 18.00 horas na sala de exposicións do auditorio. Os contos están baseados en obras de diferentes pintoras.

En Moaña hoxe celébrase un festival de música, desde as 23.30 horas na alameda, con Silvia G, Dj Sü e Honorata.