Tanxugueiras: 10 anos cun concerto no Coliseum en outubro

Tanxugueiras, no Coliseum, no 2023. / Casteleiro/Roller Agencia Máis A Coruña.

As galegas Tanxugueiras celebran en 2026 o seu décimo aniversario como grupo e van facelo con dobre festa. Por un lado, anuncian que actuarán no Coliseum da Coruña e, por outro, adiantan que ao longo deste ano sacarán novo disco. Xa teñen decidido o nome: «O cuarto».

Ese é tamén o seu número tras os álbums «Tanxugueiras», «Contrapunto» e «Diluvio». Este último -que estivo no top dos máis vendidos no seu lanzamento- publicouse en 2022, xusto despois do éxito colleitado pola súa participación no Benidorm Fest dese ano, onde case lograron ser as representantes españolas en Eurovisión. Lembremos como as coñecemos despois de que se soubese que persoas do xurado tiñan certa amizade coa concursante Chanel.

Tanxugueiras, no Intercéltico de Moaña. / Diego Seixo

Tanxugueiras celebran dez anos no Coliseum en outubro

O álbum está producido por Iago Pico (que tamén produciu «Diluvio») e polo lucense Gabi Fernández. Na nota remitida pola súa oficina representante, sinalan que Aida, Sabela e Olaia evolucionan cara «unha proposta máis madura». Tamén indican que «reafirman o seu compromiso co idioma e o folclore galego», que seguen a ser os «alicerces esenciais» da súa identidade.

Este cuarto disco van desvelalo en directo o 17 de outubro no Coliseum da Coruña. Será o seu único concerto en Galicia este ano. As entradas estarán á venda este mércores 4 de marzo a partir das 12.00 horas na web oficial de Tanxugueiras.

O emblemático lugar garda un oco especial no corazón do grupo xa que en 2023 fixeron historia ao se converteren nas primeiras artistas galegas en colgar o cartel de todo vendido no recinto. Alí chegaron a reunir a case 9.000 persoas que asistiron ao peche da xira «O derradeiro diluvio».

Deste xeito, Tanxugueiras quere volver a ese lugar especial para celebrar os seus dez anos, para lembrar o vivido nesta década, pero tamén «para marcar o comezo dunha nova etapa», sinalan.