A conselleira de Medio Ambiente e Cambio Climático, Ánxeles Vázquez, e o alcalde do Páramo, Benjamín García, analisaron nunha reunión celebrada en Santiago de Compostela as posibilidades de acometer melloras no sistema de saneamento do concello.
Na reunión abordáronse as deficiencias que presentan as sete depuradoras compactas enterradas das que dispón o Concello e as opcións para acometer as actuacións necesarias para mellorar o seu funcionamento e, por tanto, o servizo que prestan á veciñanza.
A conselleira informou ao alcalde de que unha posibilidade para levar a cabo eses traballos sería a liña de axudas que cada ano convoca Augas de Galicia destinada a concellos para a renovación e/ou instalación de sistemas de depuración autónomos. En concreto, na convocatoria deste ano as axudas oscilaban entre os 7.500 euros e os 20.000 euros, en función do número de vivendas ás que dan servizo.
Abastecemento e perdas de auga
Ademais do saneamento, na reunión a conselleira e o rexedor analisaron tamén a situación da rede de abastecemento municipal. Ambos fixeron especial fincapé na necesidade de reducir as perdas de auga.
Neste senso, Ánxeles Vázquez puxo en valor que O Páramo é un dos concellos que xa conta cunha auditoría que permite cuantificar as perdas de auga, avaliar o estado das infraestruturas e optimizar a eficiencia hidráulica.
Claves
- As axudas de Augas de Galicia para concellos están destinadas á renovación e/ou instalación de sistemas de depuración autónomos.
- A liña de axudas convócase cada ano.
- Na convocatoria deste ano as axudas oscilaban entre 7.500 e 20.000 euros, segundo o número de vivendas ás que dan servizo.
Fonte: Augas de Galicia
