O número medio de persoas afiliadas á Seguridade Social con residencia en Galicia situouse en 1.062.407 en agosto de 2026, o que supón un incremento interanual do 2,0% e un descenso do 0,1% respecto ao mes de xullo, segundo datos do Instituto Galego de Estatística (IGE) publicados o 30/09/2026.
En total rexistráronse en Galicia 1.134.483 afiliacións medias, un 0,1% menos que no mes anterior e un 2,1% máis que en agosto de 2025. Delas, 1.104.606 (o 97,4%) correspondían a persoas cuxo concello de residencia se encontraba en Galicia, cifra que se mantivo estable respecto a xullo e creceu un 2,1% en comparación cun ano antes.
Credecemento nos grandes concellos
Entre agosto de 2025 e agosto de 2026, o número de persoas afiliadas aumentou nos sete grandes concellos galegos. En seis deles o crecemento superou o 2,0% rexistrado no conxunto de Galicia, mentres que en Santiago de Compostela foi inferior á media galega (1,9%). Os maiores incrementos deronse en Ferrol (3,6%), A Coruña (3,1%) e Pontevedra (2,7%).
Por número de afiliados, Vigo encabeza a lista con 116.663 persoas, seguida de A Coruña (99.372), Santiago de Compostela (42.521), Lugo (40.565), Ourense (39.598), Pontevedra (32.492) e Ferrol (20.666).
A análise por sexo mostra un comportamento diferenciado: o incremento interanual foi maior entre as mulleres no conxunto de Galicia e en A Coruña e Pontevedra, mentres que en Ferrol, Santiago de Compostela, Lugo, Ourense e Vigo foi superior entre os homes.
Peso dos sectores
O sector servizos concentrou o 73,6% das afiliacións de residentes en Galicia (812.892), seguido da industria (13,6%, con 150.751), a construción (7,4%, con 81.196) e a agricultura e pesca (4,6%, con 51.360). A suma por sectores non coincide co total debido á existencia de afiliacións sen sector de actividade asignado.
As maiores proporcións de afiliacións en agricultura e pesca rexístranse no interior da provincia de Lugo, nas comarcas coruñesas de Xallas, Terra de Melide e Arzúa, na comarca do Deza e nalgúns municipios costeiros con actividade pesqueira relevante. A industria ten maior peso no sur da provincia de Pontevedra e nas comarcas de Valdeorras, Barbanza, Caldas e O Sar: máis do 30% das afiliacións de Carballeda de Valdeorras, Valga, Pontecesures e Catoira corresponden a este sector.
A construción supera o 17% en Gomesende, Vimianzo, Coristanco e Cabana de Bergantiños, e destaca especialmente nos concellos da Costa da Morte, ademais de en municipios do sur e oeste da provincia de Ourense. O sector servizos mostra maior peso nos sete grandes concellos e os seus municipios limítrofes, e noutros concellos con función urbana ou terciaria destacada, como Mondariz Balneario, Corcubión ou Monforte de Lemos.
