A Deputación de Pontevedra abre este luns 19 de outubro o prazo para solicitar as visitas ás granxas escola da provincia no marco do programa Vive o Rural. Poderá participar o alumnado dos centros escolares públicos dos concellos de menos de 50.000 habitantes.
Esta nova edición da iniciativa, posta en marcha pola institución provincial, conta este ano con 120.000 euros, 40.000 máis de orzamento respecto á terceira edición do programa, co fin de dar cabida a un maior número de beneficiarios.
Poderán gozar da cuarta edición do programa Vive o Rural tanto os propios centros, de educación infantil, primaria e secundaria, como as ANPA legalmente constituídas. Estas recibirán un máximo de 1.250 euros (25 euros por alumno ata un máximo de 50) co obxecto de financiar o custo das entradas ás instalacións e os gastos de desprazamento en transporte colectivo.
As saídas realizaranse en calquera das seis granxas escola situadas na provincia: Serantellos (en Cambados), Fervenzaventura (en Silleda), Kiriko (en Fornelos de Montes), Corazón de Carballo (en Tomiño), Río Mouro (en Poio) e A Gotiña (en Covelo).
Actividades previstas
Nas saídas de Vive o Rural realizaranse actividades de toma de contacto cos animais, labores da horta, talleres educativos ou xogos, todas elas coa finalidade de que o alumnado se achegue á realidade das actividades agrícolas e gandeiras e adquira coñecementos prácticos sobre a produción local, as características dos cultivos, a vida dos animais, o coidado do medio natural e a valorización do sector primario.
Ademais, neste programa provincial tamén se afondará na posta en valor da mantenza da biodiversidade, da paisaxe e da tradición agraria como elemento de identidade da cultura da provincia.
Claves
- Prazo de solicitudes: do 19 de outubro ao 1 de decembro.
- Dirixido a: alumnado de centros escolares públicos de concellos de menos de 50.000 habitantes.
- Poderano solicitar os centros (educación infantil, primaria e secundaria) e as ANPA legalmente constituídas.
- Axuda máxima: 1.250 euros (25 euros por alumno ata un máximo de 50).
- A axuda financia as entradas ás instalacións e os gastos de desprazamento en transporte colectivo.
- Orzamento da edición: 120.000 euros.
- Granxas escola: Serantellos (Cambados), Fervenzaventura (Silleda), Kiriko (Fornelos de Montes), Corazón de Carballo (Tomiño), Río Mouro (Poio) e A Gotiña (Covelo).
Fonte: Deputación de Pontevedra
