O alcalde de Vigo, Abel Caballero, defendeu que a ampliación de Balaídos para o Mundial de Fútbol de 2030 suporá un investimento histórico para a cidade, cun retorno económico que, segundo afirmou, superará con moito o seu custo. O rexedor asegurou que o novo estadio quedará en Vigo «para os próximos cen anos».
Caballero explicou que a reforma permitirá contar cun estadio de 43.000 espectadores durante a competición e arredor de 41.500 localidades para os partidos do Celta, ademais de abrir a posibilidade de celebrar grandes concertos de ata 45.000 asistentes. Segundo o alcalde, o Mundial permitirá atraer grandes eventos deportivos e musicais, incrementar a proxección internacional da cidade e xerar actividade económica durante décadas.
O Concello xa activou a fase final da candidatura cunha proposta de convenio de 107,5 millóns de euros para financiar a tres partes entre Xunta, Deputación e Concello as actuacións pendentes. A intervención principal será a ampliación do gradario de Tribuna, cun custo estimado de 86,7 millóns, á que se suman os campos e centros de adestramento, as adaptacións do estadio e os gastos organizativos da competición.
A achega correspondente a cada administración rondaría os 35,85 millóns de euros, distribuídos ao longo de catro anos, o que representa aproximadamente 9 millóns anuais. Caballero considerou que esta cantidade é «perfectamente asumible» para un Concello cun orzamento superior aos 350 millóns de euros, e subliñou que o investimento se sumará ás políticas de vivenda, servizos sociais, humanizacións, mobilidade vertical ou novas instalacións deportivas. Recordou que o Concello xa afrontou, xunto coa Deputación, a transformación dos graderíos de Río, Marcador e Gol.
Diferenzas co prometido na candidatura da Coruña
O alcalde criticou a negativa expresada pola Xunta a asumir un terzo da financiación da candidatura viguesa e contrapúxoa coa disposición que, segundo afirmou, mostrou o Goberno galego para sufragar o 25% da reforma integral de Riazor, incluídas as catro tribunas e un túnel baixo o estadio. «Na Coruña estaban dispostos a pagar máis do dobre do que pedimos para Vigo. Na Coruña, si; en Vigo, non», denunciou Caballero, quen acusou o Executivo autonómico de aplicar un criterio diferente segundo a cidade.
O alcalde rexeitou ademais os argumentos sobre os prazos de execución da nova Tribuna e asegurou que Vigo pode completar as obras a tempo. Recordou que a reforma de Balaídos comezou hai máis dunha década e que o Concello xa está executando o traslado dos colectores necesario para acometer a ampliación. Destacou tamén o apoio do Real Club Celta ao proxecto e reclamou á Xunta e á Deputación que se incorporen ao acordo de financiación para garantir a celebración da competición en Vigo.
Fonte: Concello de Vigo
