A Deputación de Pontevedra inicia este sábado as visitas teatralizadas ao Castelo de Sobroso con todas as prazas esgotadas. As actividades, pensadas para todos os públicos, comezarán o sábado 17 de outubro ás 16:30 horas e estenderanse ata o 1 de novembro, do mesmo modo que as visitas ao Castelo de Soutomaior, que neste caso comezaron xa o pasado fin de semana.
As visitas, producidas por EscénaTe, amosarán a historia dos castelos, as súas lendas e os personaxes que habitaron neles para achegalos á cidadanía de xeito lúdico e divertido. En total, 470 persoas gozarán das actividades en 26 quendas diferentes, cun aforo de 15 persoas por pase no caso de Sobroso e de 20 en Soutomaior.
Nas visitas ao Castelo de Sobroso, os participantes gozarán de «Os sinais de Sobroso», unha proposta na que o público integrarase na ficción como parte da poboación refuxiada na fortaleza durante o cerco sufrido pola raíña Dona Urraca, e percorrerá os seus espazos descubrindo, a través da acción, como funcionaban os seus elementos e a súa relación co territorio. A experiencia combinará divulgación histórica, interpretación do patrimonio, intriga, humor e elementos da tradición galega vinculados ao Samaín e á Noite de Defuntos.
No Castelo de Soutomaior, a proposta é «As voces de Soutomaior», que invita o público a percorrer os seus espazos a través das distintas épocas e personaxes que deixaron pegada na súa historia: Pedro Madruga e a memoria da revolta Irmandiña, o marqués da Vega de Armijo e o ambiente social e político do século XIX, así como María Vinyals, que permiten descubrir a transformación do castelo en residencia, lugar de cultura e espazo aberto a novas ideas.
Claves
- As visitas a Sobroso comezan o sábado 17 de outubro ás 16:30 horas, continúan o domingo á mesma hora e os días 24, 25 e 31 de outubro e 1 de novembro, con dous pases diarios, ás 11:30 e ás 16:30 horas.
- As visitas a Soutomaior comezaron o pasado fin de semana e continúan o 17, 18, 24, 25 e 31 de outubro, pechándose o 1 de novembro.
- As prazas das visitas teatralizadas ao Castelo de Sobroso están esgotadas.
Fonte: Deputación de Pontevedra
