O Concello de Verín inicia este fin de semana unha nova tempada de cinema comercial na Casa da Cultura coa proxección de «La bola negra», a nova película dirixida por Javier Calvo e Javier Ambrossi, coñecidos artisticamente como Los Javis. As sesións celebraranse os días 16, 17 e 18 de outubro, con cinco pases distribuídos ao longo da fin de semana.
Con esta primeira proxección, a Casa da Cultura recupera a súa programación de cinema comercial, ofrecendo á veciñanza a posibilidade de gozar de estreas cinematográficas na propia vila, sen necesidade de desprazarse a outras localidades. O Concello destaca que a recuperación das sesións permite ampliar a oferta cultural e de lecer do concello e consolidar a Casa da Cultura como un espazo de encontro en torno á sétima arte.
A película elixida para abrir a tempada é un drama español de 158 minutos que conta cun repartimento integrado por Guitarricadelafuente, Miguel Bernardeau, Carlos González, Milo Quifes, Lola Dueñas, Penélope Cruz e Glenn Close. A historia entrelaza as vidas de tres homes en tres épocas distintas, conectadas pola sexualidade, o desexo, a dor e a herdanza, tomando como referencia unha das últimas obras inacabadas do escritor Federico García Lorca. O filme está clasificado como non recomendado para menores de 16 anos.
O prezo da entrada será de 5 euros. A carteleira, coas películas previstas e os horarios das próximas proxeccións, poderá consultarse na páxina web municipal, www.verin.gal.
Claves
- Lugar: Casa da Cultura de Verín.
- Venres 16 de outubro: 20:30 horas.
- Sábado 17 de outubro: 17:00 e 20:30 horas.
- Domingo 18 de outubro: 17:00 e 20:30 horas.
- Prezo da entrada: 5 euros.
- Clasificación: non recomendada para menores de 16 anos.
- Carteleira e programación: www.verin.gal.
Fonte: Concello de Verín
