A presidenta da Deputación de Lugo, Carmela López, participou este martes na mesa de peche do foro Territorios que lideran: o futuro comeza no local, celebrado en Santiago de Compostela ao longo de dúas xornadas por iniciativa da Facultade de Ciencias Políticas e Sociais.
A iniciativa reuniu coñecemento académico con experiencia de xestores municipais, como a alcaldesa de Burela e presidenta da Deputación lucense. López interveu nun diálogo sobre o futuro do municipalismo en Galicia conducido pola decana da facultade, Marta Lois, e no que tamén participaron a tenente de alcaldesa de Santiago, María Rozas, e a alcaldesa de Tomiño, Sandra González.
As mandatarias falaron das súas experiencias de goberno, deténdose nas iniciativas que están a resultar máis transformadoras nos seus territorios. Neste punto, López referiuse á «transformación social» na que traballa en Burela. «Burela é unha vila de persoas de moitas procedencias. Eso forma parte de quen somos, pero a convivencia non sucede automaticamente por vivir na mesma rúa. Hai que crear oportunidades para coñecernos e tamén ofrecer apoio a quen o precisa para poder participar na vida da vila», sinalou.
A rexidora falou ao auditorio de Políticas —formado por alumnado da facultade e do máster de Goberno Local e Políticas Públicas, por técnicos municipais e académicos— do programa De Cabo a Cabo, celebrado este ano con motivo do encontro entre España e Cabo Verde no Mundial de fútbol. «Pero a convivencia non pode durar só un día. Está tamén nas actividades que levamos aos colexios para que a rapazada escoite experiencias de migración contadas por quen as viviron; na formación en idiomas; e no acompañamento social, psicolóxico e xurídico que ofrecemos», explicou.
As mandatarias tamén analizaron as relacións entre os concellos e o resto das administracións (deputacións, Xunta e Estado). López pediu respecto e recursos para os concellos. «Somos a primeira porta á que chama a veciñanza. Se unha familia precisa coidados ou unha persoa non atopa vivenda para vir traballar, non lle podemos responder simplemente que iso lle corresponde a outra administración. Intentamos buscar solucións, pero necesitamos financiación e capacidade para actuar».
A presidenta da Deputación reivindicou, ademais, lealdade institucional. «Unha alcaldesa ou un alcalde non debería ter medo de quen goberna noutra institución. Debería poder chamar, explicar o que necesita o seu concello e ser escoitado. Non se pode atender máis a unha vila porque a súa alcaldesa pensa como ti, nin deixar de escoitar a un alcalde porque pensa diferente. Quen paga esa diferenza de trato non é o cargo», afirmou.
López explicou tamén o seu método fronte ao odio que reciben os políticos nas redes sociais: «Eu nunca respondo e cando atopo os haters pola rúa pídolles que me expliquen cal é o problema ou en que non están de acordo».
Fonte: Deputación de Lugo
