A Xunta de Goberno Local do Concello de Lugo aprobou os proxectos de modificación de distintas ordenanzas fiscais municipais, que incorporan novos incentivos para favorecer a implantación de actividades económicas e a ampliación das existentes cando leven consigo a creación de emprego indefinido. As medidas, con reducións de ata o 80 % no IBI, no ICIO e no IAE, apróbanse agora para completar a súa tramitación e garantir que poidan entrar en vigor o 1 de xaneiro de 2027.
Estas medidas forman parte dos pasos necesarios para a incorporación de Lugo á iniciativa galega de Concellos Emprendedores, Doing Business Galicia. As bonificacións estabécense en función dos novos postos de traballo creados: un 50 % para entre 1 e 10 empregos, un 75 % para entre 11 e 20, e un 80 % para 21 ou máis. Os novos contratos deberán ser indefinidos, a xornada completa e destinados a persoas desempregadas inscritas como demandantes de emprego.
Bonificacións por imposto
No Imposto sobre Construcións, Instalacións e Obras (ICIO), a modificación da Ordenanza Fiscal nº 202 incorpora unha bonificación para as obras vinculadas á implantación de novas actividades económicas ou á ampliación das existentes que cumpran estes requisitos. Os postos de traballo creados deberán manterse durante os tres exercicios posteriores á finalización das obras.
No Imposto sobre Bens Inmobles (IBI), a modificación da Ordenanza Fiscal nº 203 establece unha bonificación para os inmobles nos que se desenvolvan estas actuacións. Terá unha duración de tres anos, sempre que se acredite o mantemento dos novos postos de traballo durante o período bonificado. O IAE, pola súa banda, incorpora unha bonificación durante tres exercicios para as empresas que implanten unha nova actividade ou amplíen as súas instalacións, debendo producirse un incremento neto do persoal.
A proposta de modificación do IBI tamén introduce cambios noutras bonificacións. Manteñense as bonificacións do 30 % para a categoría xeral e do 50 % para a especial na vivenda habitual das familias numerosas, e introduce unha novidade para os supostos de separación ou divorcio: considerarase vivenda habitual de cada proxenitora aquela na que estea empadroado. Para os inmobles vinculados a actividades agrarias e gandeiras declaradas de interese ou utilidade municipal, mantense a bonificación do 95 % durante tres anos, que se aplicará desde o período impositivo seguinte ao da presentación da solicitude, en lugar de desde o exercicio seguinte ao da concesión.
No Imposto sobre Vehículos de Tracción Mecánica (IVTM), a modificación da Ordenanza Fiscal nº 200 amplía de tres a cinco anos a duración das bonificacións para os vehículos menos contaminantes, cunha redución do 50 % para os híbridos e do 75 % para os eléctricos, os de emisións nulas e os que empreguen os combustibles alternativos previstos na ordenanza. Estas bonificacións deberán solicitarse expresamente.
Finalmente, a modificación da Ordenanza Fiscal Xeral cambia o criterio de aplicación do importe mínimo de 1.000 euros de débeda principal pendente para a derivación da acción de cobramento por sancións de tráfico: nos supostos en que o propietario sexa responsable, este límite vincularase ao vehículo, en lugar de ao conxunto do expediente executivo aberto ao infractor.
Os proxectos serán elevados ao Pleno para a súa aprobación inicial. A previsión é que as modificacións entren en vigor o 1 de xaneiro de 2027, unha vez completada a tramitación e publicada a súa aprobación definitiva no Boletín Oficial da Provincia.
Claves
- Bonificacións de ata o 80 % no ICIO, no IBI e no IAE.
- Porcentaxes: 50 % para entre 1 e 10 empregos, 75 % para entre 11 e 20 e 80 % para 21 ou máis.
- Os novos contratos deberán ser indefinidos, a xornada completa e destinados a persoas desempregadas inscritas como demandantes de emprego.
- No ICIO, os postos creados deberán manterse durante os tres exercicios posteriores á finalización das obras.
- A bonificación do IBI terá unha duración de tres anos e a do IAE, tres exercicios.
- No IVTM, as bonificacións amplíase de tres a cinco anos: 50 % para híbridos e 75 % para eléctricos, de emisións nulas ou con combustibles alternativos; deberán solicitarse expresamente.
- Entrada en vigor prevista: 1 de xaneiro de 2027, tras a tramitación e publicación da aprobación definitiva no Boletín Oficial da Provincia.
Fonte: Concello de Lugo
