O Concello de Ourense cedeu a Cáritas Diocesana de Ourense o uso de 3 vivendas sociais, que se destinarán ao proxecto Luscofusco, un programa de vivenda temporal e inclusión social que ofrece acollida a persoas e familias en situación de vulnerabilidade ou exclusión residencial.
O alcalde, Gonzalo Pérez Jácome, e a concelleira de Asuntos Sociais, Tamara Silva, entregaron esta mañá as chaves dos pisos á directora de Cáritas Diocesana de Ourense, María Tabarés, e ao delegado da entidade, Ángel Feijóo Mirón. O acto tivo lugar nun dos inmobles, situado na rúa Apolo. Os outros 2 están na Praza 100 e na rúa Guizamonde.
As tres vivendas son de titularidade municipal, foron reformadas e cedidas á entidade ourensana para que as xestione durante un período de 5 anos. Contan con similares características: 3 dormitorios, cociña, baño e salón.
Tamara Silva explicou que o obxectivo da cesión é «colaborar con Cáritas unha vez máis para que poidan xestionar estes pisos e axudar ás familias máis necesitadas de Ourense. Son pisos amplos que poden acoller a familias con menores ao seu cargo. Cáritas encárgase ademais de facerlles un seguimento, tanto dos menores a nivel escolar como das familias para reinseralas laboralmente. É un programa moi completo e con isto axudamos a atender esta necesidade».
María Tabarés manifestou que, para Cáritas, a dispoñibilidade destes espazos «significa xerar oportunidades para as familias que o están pasando mal. Desde hai anos, a vivenda é un factor de exclusión social. Leva a maior parte dos ingresos das persoas traballadoras e é inaccesible para xente que está en situación de exclusión».
O programa de Cáritas «permite que poidan plantexarse un futuro nunhas condicións dignas, xa que un non pode estar buscando traballo se non ten onde durmir», subliñou Tabarés. Ademais da vivenda, o programa proporciona «un acompañamento en formación competencial. Ensínamos á xente un oficio, acompañámola no proceso de busca de emprego e xeramos condicións para que esa familia poida saír adiante e que os seus nenos permanezcan en contornos normalizados e non sexan discriminados», aseverou.
Fonte: Concello de Ourense
