A Xunta iniciou esta tarde a toma de mostras da nova fase do proxecto Xenoma Galicia nos concellos correspondentes ao distrito sanitario de Cee. As extraccións de sangue realízanse no Hospital Público Virxe da Xunqueira para as persoas que foron convidadas a participar no estudo. A recolla de mostras tamén se levará a cabo o día 22 deste mesmo mes.
O horario para acudir á extracción, con cita previa, é das 15,30 ás 18,30 horas e non é necesario presentarse en xaxún. Durante a toma de mostras, o persoal sanitario informa as persoas participantes de todos os pasos do proceso.
Para esta nova recolla enviáronse de xeito aleatorio 342 mensaxes SMS de invitación a participar no distrito sanitario de Cee. O obxectivo é alcanzar a participación de 68 persoas.
Resultados acumulados do proxecto
O proxecto Xenoma Galicia leva analizadas ata agora 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 dos voluntarios dos primeiros distritos participantes.
A análise das mostras destes 1.279 participantes da fase 1 permitiu atopar 25 casos positivos máis para as patoloxías cribadas. En concreto, 14 participantes deron positivo en cancro de mama e ovario hereditario, 2 en síndrome de Lynch e 9 en hipercolesterolemia familiar.
Claves
- As extraccións realízanse no Hospital Público Virxe da Xunqueira.
- A recolla de mostras tamén se levará a cabo o día 22 deste mesmo mes.
- O horario para acudir á extracción, con cita previa, é das 15,30 ás 18,30 horas.
- Non é necesario presentarse en xaxún.
- As persoas convidadas son seleccionadas de xeito aleatorio e reciben unha mensaxe SMS no seu teléfono móbil.
Fonte: Xunta de Galicia
