A Deputación de Pontevedra activa un espazo pop-up temporal en Madrid para fomentar experiencias en torno á campaña “Rías Baixas: a túa meta, o teu destino”. Trátase da primeira vez que o organismo impulsa esta acción promocional, que levará ata a praza de Callao experiencias de realidade virtual en torno á náutica e o surf na provincia de Pontevedra.
O espazo pop-up, no que tamén se achegará información sobre o destino Rías Baixas, estará operativo entre o venres 16 e o domingo 18 de outubro, cun horario previsto de atención de oito horas diarias, das 12:00 ás 20:00 horas.
O destino provincia de Pontevedra ocupará o número 1 da praza de Callao de Madrid, nun espazo con pantallas interiores e exteriores e vinilos con imaxes singulares do destino Rías Baixas.
Neste espazo instalaranse dous postos de realidade virtual, un de vela e outro de surf, para fomentar a interacción co público, conectar a experiencia coa campaña e, ao mesmo tempo, promocionar a provincia como destino de turismo activo.
No posto de vela, as persoas participantes poderán vivir unha experiencia náutica virtual en alta mar, navegando polas augas das Rías Baixas e contemplando as paisaxes da provincia. No posto de surf, as persoas subirán a unha táboa real de surf para que a inmersión sexa o máis real posíbel.
A campaña “Rías Baixas: a túa meta, o teu destino” reafirma o compromiso da Deputación cun modelo turístico innovador, sostíbel e de calidade, no que o deporte actúa como motor de desenvolvemento económico, social e territorial. A campaña busca consolidar as Rías Baixas como un destino de referencia para o turismo.
Claves
- Datas: do venres 16 ao domingo 18 de outubro.
- Horario: das 12:00 ás 20:00 horas, oito horas diarias.
- Lugar: número 1 da praza de Callao, Madrid.
- Acceso a dous postos de realidade virtual, un de vela e outro de surf, con premios ás mellores puntuacións.
Fonte: Deputación de Pontevedra
