A secretaria xeral de Emprego e Relacións Laborais, Susana Pérez Iglesias, xunto coa directora xeral de Traballo Autónomo e Economía Social, Marta Vázquez Guzmán, participou este 23 de outubro de 2026 en Pontevedra nunha charla relacionada co emprendemento na escola e a economía social na educación, no marco do 15º Salón de educación e formación de Galicia, Edugal.
Na súa intervención, Pérez Iglesias destacou a importancia de citas como esta para impulsar iniciativas emprendedoras do ámbito educativo e o intercambio de ideas e sinerxias neste campo.
A secretaria xeral referiuse tamén ao concurso Eduemprende Idea 2026, unha iniciativa autonómica que promove a creación de proxectos empresariais no ámbito escolar. Esta mesma semana, o Diario Oficial de Galicia publicou a resolución dos seis proxectos emprendedores premiados no certame.
A charla é unha das actividades organizadas no expositor da Consellería de Emprego, Comercio e Emigración en Edugal. Nese mesmo espazo celébrase ademais un obradoiro de serigrafía sobre téxtil, realizado coa colaboración da Fundación Artesanía de Galicia e impartido por María José Martínez e José María Carrera, de Peixesapop.
A cita, que conclúe hoxe, conta cunha presenza destacada da Xunta de Galicia a través de espazos relacionados con distintas áreas.
Edugal forma parte de Galicia Educa, o calendario de 16 feiras que impulsa a Xunta por todo o territorio para achegar ao alumnado a oferta educativa, información e recursos para decidir o seu futuro académico e profesional.
Fonte: Xunta de Galicia
