O Domingo das Mozas, unha das xornadas grandes das festas de San Froilán, encheu Lugo o domingo 11 de outubro de 2026 de tradición e cultura galega, cun programa que reuniu a exaltación do vestuario tradicional, a música popular e a homenaxe a Rosalía de Castro.
A alcaldesa de Lugo, Elena Candia, encabezou xunto a concelleiros da corporación municipal o desfile do traxe tradicional galego, no que participaron integrantes de varias asociacións culturais lucindo prendas representativas de diferentes comarcas galegas. Candia destacou que «o noso patrimonio cultural ten unha enorme riqueza e forma parte da nosa identidade como galegos e galegas, e así llo debemos transmitir ás futuras xeracións», e agradeceu ás asociacións participantes que compartisen esta riqueza coa cidadanía e permitisen disfrutar de traxes tradicionais «coidados con tanto mimo».
Durante a exhibición de vestimenta, Teresa Astorgano, presidenta do Grupo Etnográfico Traxandaina, explicou que «o Camiño Primitivo e as demais rutas xacobeas tamén deixaron a súa pegada na vestimenta tradicional galega», xa que o paso dos peregrinos trouxo novas influencias, tecidos e bordados que enriqueceron os traxes.
No desfile participaron a Asociación do Camiño Primitivo de Baleira, a Asociación Cultural Peleriños de Sarria, Airiños de Orbazai, Amigos do Camiño e o Grupo Etnográfico Traxandaina. A xornada comezou cunha exhibición dos traxes na Praza Maior e o desfile continuou ata o parque Rosalía de Castro, onde se celebrou a tradicional ofrenda floral ante a figura da escritora, a cargo de Sandra Piñeiro, presidenta da Audiencia Provincial de Lugo.
Música tradicional no casco histórico
Paralelamente ao desfile, a XXVIII Mostra de Música Tradicional Galega levou a música popular ao casco histórico durante a mañá e a tarde. Organizada pola Asociación de Gaiteir@s Galeg@s, a cita reuniu máis dunha decena de formacións co obxectivo de difundir e exaltar a música tradicional galega e achegala á cidadanía.
As pasarrúas celebráronse das 11.30 ás 14.00 horas e das 17.00 ás 18.00 horas. Pola mañá, os grupos saíron da Mosqueira e percorreron diferentes rúas e prazas do recinto amurallado ata terminar na Praza Maior. Pola tarde retomaron as actuacións de rúa, que deron paso aos concertos na Praza de Santa María.
Na mostra participaron Arume de Boiro, Axeigo, Lembranzas do Tambre, Lubicáns, Os Mersenarios, Os Mecos de Ogrobe, Pandereteiros de Cántigas e Frores, Turoqva, Xente Nova de Ferrol e Zanfoneiros da Tradescola. A programación musical completouse na Praza de Santa María cos concertos de Bouba Pandeireteiras, ás 18.30 horas, e Os Carunchos, ás 20.00 horas.
Fonte: Concello de Lugo
