A Deputación Provincial da Xunta de Goberno da Deputación de Lugo aprobou este venres novos convenios de colaboración por case 140.000 euros para apoiar a reapertura do Punto de Atención á Infancia (PAI) de Trabada e para reconverter un inmoble en Ribeira de Piquín nun local comunitario para uso de veciños e emprendedores. Así o detallou a portavoz socialista do Goberno, Pilar García Porto, na roda de prensa posterior á reunión semanal, celebrada no Pazo de San Marcos.
Reapertura do PAI de Trabada
O órgano provincial deu luz verde a un acordo de case 40.000 euros co Concello de Trabada para colaborar coa posta en marcha do Punto de Atención á Infancia do concello. O servizo permanecía pechado desde había dous anos por falta de nenos e nenas inscritos e retomou a súa actividade a mediados do mes de setembro deste ano. O convenio fai posible a contratación dun mestre e dun técnico de Educación Infantil.
García Porto adiantou que o PAI de Trabada atende a 5 nenos e nenas de forma totalmente gratuíta, ofrecendo ás familias do concello un recurso público que facilita a conciliación da vida persoal, familiar e laboral. Ademais, está previsto que nos próximos meses se incorporen outros tres nenos e nenas, o que permitirá ampliar o número de familias beneficiarias.
Taller comunitario en Ribeira de Piquín
A institución provincial aprobou tamén un convenio de 200.000 euros coa Fundación Terreo de Ribeira de Piquín —100.000 euros achegados pola Deputación e outros 100.000 pola Fundación— para poñer en marcha un taller comunitario nun inmoble situado no lugar de Montefurado. A achega permitirá adquirir o edificio, de 275 metros cadrados de superficie total nunha única planta, con 204 metros cadrados destinados ao uso principal e 71 metros cadrados de almacén, así como dotar as instalacións do equipamento necesario.
O obxectivo é crear unha infraestrutura de apoio á actividade agroalimentaria local, que poida ser empregada pola veciñanza, pequenas explotacións agrarias, persoas produtoras e empresas da zona que necesiten un espazo adecuado para conservar e manipular os seus produtos. O proxecto contempla a adquisición de equipamento específico como unha cámara frigorífica, sistemas de climatización, equipamentos de aceiro inoxidábel e sistemas de pesaxe. A iniciativa permitirá aos usuarios compartir instalacións, reducir custos e facilitar a transformación e comercialización de produtos locais, mediante a elaboración de conservas, marmeladas, zume, preparados hortícolas, mel envasada e outras elaboracións artesanais. A previsión é que a infraestrutura estea lista para o seu uso o próximo ano.
Máis garantías para os Centros de Atención a Maiores
Outro dos acordos adoptados no ámbito social foi adxudicar por un importe de máis de 230.000 euros á empresa VEOLIA SERVICIOS NORTE SAU a instalación de grupos electróxenos para as residencias de maiores.
A Xunta de Goberno tamén deu luz verde a obras en cinco estradas dos concellos de Monterroso, As Nogais e O Valadouro, e autorizou a Milla Internacional do Cantábrico de Viveiro.
Fonte: Deputación de Lugo
