Traballadora que denunciou acoso na Deputación de Lugo desiste

O xulgado do Social de Lugo tiña fixado para este venres o xuízo pola denuncia de acoso laboral que unha traballadora da Deputación presentou contra a institución, o seu expresidente, José Tomé; a deputada Pilar García Porto e a xefa do departamento de Recursos Humanos.

Todos eles, ademais de varios traballadores e extraballadores de San Marcos, estaban citados para prestar declaración, pero a sesión non chegou a celebrarse porque, no último momento, a traballadora desistiu da demanda.

A denuncia e a situación da traballadora

A muller, con varias décadas de exercicio na Deputación, acudiu ao xulgado porque sostiña que desde 2023 sufría unha situación de acoso, que a levou a unha baixa médica.

Neste momento está a piques de cumprir un ano e medio nesta situación.

Cambios na xefatura e expediente disciplinario

Segundo a súa versión, cando a xefatura do servizo cambiou e se nomeou, por unha atribución temporal de funcións, a unha traballadora que formaba parte do servizo e que, ademais, forma parte da estrutura orgánica do PSOE, ela empezou a ser apartada das súas funcións e a sufrir degradación profesional, aseguraba.

Nese tempo coincidiu que á denunciante lle foi aberto un expediente disciplinario, que se materializou en tres días de suspensión de emprego e soldo e no traslado do posto de traballo durante un ano.

As medidas non chegaron a aplicarse porque a afectada recorreu ao xulgado, que decretou a suspensión como medida cautelar ata a celebración do xuízo.

Este foi en xaneiro e aínda non hai resolución.

Nos días previos ao xuízo foi cando a traballadora presentou a demanda por acoso laboral, que finalmente decidiu retirar.

Informes e testemuños do caso

Fontes coñecedoras do caso explican que era moi difícil que prosperase porque, ao contrario do que sostiña a demandante, hai datos e testemuños que apoiarían que o malestar da afectada estaría relacionado cos cambios que a nova xefa de Recursos Humanos introduciu na operativa do servizo, así como co rexeitamento dalgúns dos plantexamentos que lle tería feito a demandante.

Hai, ademais, algún informe do servizo de prevención de riscos laborais da Deputación que conclúe que non só non houbo acoso laboral a esta traballadora senón que era o resto do persoal do servizo quen sufría riscos psicosociais pola actitude que a demandante tiña con eles.