O deputado de Promoción Económica e Social da Deputación de Lugo, Pablo Rivera Capón, reivindicou este luns o papel das mulleres e da innovación para garantir o futuro do rural. Fixoo na apertura institucional da xornada «Sementando futuros resilientes para o rural: mulleres e innovación, gobernanza e benestar», celebrada na Escola Politécnica Superior de Enxeñaría da Universidade de Santiago de Compostela, no campus de Lugo.
Na súa intervención, Rivera subliñou que «sen as mulleres non hai rural posible, e sen rural non temos futuro nesta provincia». Con esta reflexión, o deputado puxo o foco na importancia de recoñecer e visibilizar o traballo das mulleres, que cualificou de fundamental para a vida económica e social do rural.
Rivera defendeu, ademais, que a igualdade de xénero debe estar presente en todas as políticas públicas e lembrou que o futuro do rural pasa por ofrecer oportunidades, apoiar o tecido económico, impulsar a formación e o emprendemento e facilitar servizos.
A xornada, que se desenvolve durante toda a mañá no salón de actos do centro educativo, inclúe a conferencia da enxeñeira de Telecomunicacións Sonia Valladares sobre a transformación dixital e as oportunidades para as mulleres rurais. O programa contempla tamén unha mesa redonda na que participan a emprendedora Chelo López e a representante de FADEMUR, Verónica Marcos.
A xornada acolle así mesmo a presentación da exposición «Mulleres no rural: unha realidade invisibilizada», a cargo das profesoras Rosa Romero e María Iniesto. A mostra está vinculada á serie fotográfica «Facedoras de Lugo», de Mar Caldas, e pon o foco na visibilidade das mulleres e a súa contribución á realidade rural.
A apertura institucional contou tamén coa participación da vicerrectora de Cultura, Lingua e Patrimonio da USC, Ana Cabana; do director da Escola Politécnica Superior de Enxeñaría, Carlos Amiama; e da presidenta da Comisión de Igualdade de Xénero do centro, Dolores Fernández.
Fonte: Deputación de Lugo
