Gañadores do Quiroga Trail Challenge na Serra do Courel

O Quiroga Trail Challenge viviu o pasado fin de semana a súa duodécima edición, na que bateu o récord de inscrición, con 1.300 atletas chegados de todas as comunidades autónomas de España, agás Murcia, e tamén doutros países, como Portugal, Alemaña e Estados Unidos.

A carreira transcorre polo geoparque Montañas do Courel e consolidouse como unha cita imprescindible no noroeste peninsular dentro do calendario do trail, unha disciplina do atletismo que consiste en correr por contornos naturais.

É unha competición que se divide no Trail do Lor e no Trail do Castelo. Ambos destacan por presentar aos corredores circuítos moi técnicos e esixentes, ademais de visualmente espectaculares polos seus paisaxes.

Esta división constaba de dúas distancias ultra, de 65 e 57 quilómetros. Na primeira, os respectivos gañadores da categoría masculina e feminina foron Pablo Villa e Carolina Niño. Na segunda remataron no primeiro posto Eduardo Fabeiro e Patricia Noya.

A maratón (42 quilómetros) do Trail do Lor coroou a Daniel Domínguez e Susana Chamorro e no maxitrail, unha categoría de 35 quilómetros, os primeiros en atravesar a liña de meta foron Marcos Naya e Rosa María Araujo. No trail de 29 quilómetros, as medallas de ouro foron para Lucas Hernández e Alina Cimpean, e no minitrail, de 17 quilómetros, houbo vitorias de Miguel Vázquez e Marian Torio.

Por último, a chamada Carreiriña (9 quilómetros) rematou con Borja Asenjo e Sandra Fernández no primeiro posto das categorías masculina e feminina, respectivamente. Houbo, ademais, andainas de 17 e 10 quilómetros.

O día do Trail do Castelo, a organización entregou os premios correspondentes ás distancias desa xornada e tamén aos corredores que acumularon os mellores tempos ao competir en ambas etapas.

Os campións absolutos do circuíto ultra de 65 quilómetros foron David Porto Pérez e Carolina Niño e os do circuíto ultra de 57 quilómetros, Eduardo Fabeiro Raposo e Patricia Noya. No circuíto da maratón gañaron David Domínguez e Vanesa Varela Calvo.

No maxitrail de 35 quilómetros do Trail do Castelo, rematou como campión masculino Víctor Maneiro Freire e como mellor feminina, Carlota Muñoz Saiz. No circuíto trail de 29 quilómetros, Lucas Hernández foi o gañador absoluto e no circuíto minitrail de 17 quilómetros impuxéronse Álvaro Soto e Marian Torio. O circuíto Carreiriña de nove quilómetros proclamou vencedores absolutos a Nico Lorenzo e Sandra Fernández.