Alexandre Piñeiro Rodríguez foi nomeado novo director territorial da Consellería do Mar en Celeiro (Viveiro), onde se atopan as instalacións dese departamento autonómico.
O novo responsable de Mar na provincia asumirá nos próximos días a coordinación das políticas autonómicas vinculadas ao sector marítimo pesqueiro e acuícola.
Traxectoria profesional de Alexandre Piñeiro
Piñeiro é licenciado en Veterinaria pola Universidade de Santiago de Compostela (USC) e conta cunha ampla traxectoria profesional vinculada ao eido do sector primario e á sanidade animal.
Traballou tanto no exercicio clínico como en tarefas técnicas de campo, incluída a súa participación nas campañas oficiais de vacinación na provincia de Lugo.
Nomeamento oficial
O Diario Oficial de Galicia (DOG) recolleu onte o nomeamento de Alexandre Piñeiro por parte da conselleira do Mar, Marta Villaverde Acuña.
Designouno atendendo aos criterios establecidos na normativa reguladora da Xunta, na que se establecen as delegacións territoriais autonómicas.
Relevo na dirección territorial
Piñeiro toma o relevo de Mariña Gueimunde, quen cesou nese cargo ao asumir a alcaldía de Viveiro en marzo do pasado ano 2025, ante a imposibilidade de compatibilizar ambas responsabilidades.
O PSOE solicitou hai unhas semanas que se nomease un director territorial para que o sector tivese un interlocutor ante os retos e dificultades que afronta.
