Anxo Vidal autopublicou o seu primeiro libro fai apenas uns meses e este luns sairá a segunda parte, A voz que non calaron. Onde comeza a orixe. Con só 14 anos, Anxo Vidal, de As Pontes, ten claro que seguirá escribindo.
O argumento da segunda parte
Na primeira parte falaba do regreso a As Pontes do seu protagonista e adentrábase en temas como o acoso escolar ou a homofobia.
De que vai este? É a segunda parte e continúa narrando a vida de Álex, o protagonista, que descobre que a súa familia tiña unha casa en Abadín e a súa parella, Adrián, decide quedar alí. É a súa vida de volta á normalidade sen perder nunca os valores. Despois do éxtase vén a calma.
Inspiración e escenarios
Cambia de escenario á comarca de Terra Chá. É terreo coñecido?
Si, o meu pai é de alí, de Pedralba, dun lugar que se chama Os Carballás, e vou todos os fins de semana. A liberdade de estar alí é o que máis me gusta.
Recepción e expectativas
O libro poderase mercar en Amazon a partir do luns. Que tal funcionou o primeiro?
Bastante ben, nas vendas pasouse dos 200 e hai xente que me di que xa está a esperar pola segunda parte. A ver se gusta.
A primeira publicouna por sorpresa. Ninguén do seu círculo máis próximo sabía que escribía. Sente máis presión agora ou menos?
Non é o mesmo impacto pero hai máis presión; é máis difícil escribir este segundo libro que o primeiro porque xa hai algunhas expectativas.
Presentacións e futuro da saga
O primeiro presentouno na biblioteca municipal. Ten data para presentar este?
De momento aínda non; xa me puxen en contacto coa biblioteca e imaxínome que pronto haberá algunha.
Haberá terceira parte ou a historia remata aquí? E se a hai, xa empezou a traballar nela?
De momento non empecei a escribir, pero si vai haber terceira parte, seguro. Será xa a última para relatar os últimos días, case seguro en Abadín.
Únete a la conversación
Regístrate gratis con tu email para comentar en las noticias. Tu opinión importa.