O orzamento municipal da área de Educación de Vigo para o ano 2027 ascende a 19.445.230 euros, un 6,05% máis que en 2026, o que supón 1.100.000 euros adicionais. Así o detallou o alcalde ao presentar os datos do orzamento da área educativa, no que aumentan as partidas destinadas ás bolsas de comedor, ás escolas infantís municipais e aos ensinos artísticos.
“A educación é da maior importancia, os nenos e nenas que estudan e completan os seus estudos teñen ascensores sociais e é imprescindible a educación e formación correcta”, apuntou o alcalde ao desglosar os datos.
Bolsas de comedor e idiomas
O orzamento das bolsas de comedor alcanza os case 3 millóns (2.906.853 euros), cunha suba do 21% na cantidade das bolsas. O Concello ampliará a cantidade “se fose necesario” segundo o número de solicitudes das familias, asegurou o rexedor, quen engadiu que “non hai nenos en lista de espera”. Este ano o Concello subiu a cantidade da bolsa de 45 a 70 euros ao mes, 25 euros mensuais máis. Nesta partida inclúese o Convenio de Foanpas, cun importe de 642.405 euros.
Para a aprendizaxe de idiomas, o orzamento reserva 3.325.000 euros para o programa de inmersión lingüística «Vigo en Inglés» e 175.000 euros para as bolsas de estudos internacionais a través da Escola Oficial de Idiomas.
Limpeza, mantemento e escolas infantís
O alcalde destacou a partida destinada á limpeza dos centros educativos, que supera os 3,5 millóns de euros, á que se suman a vixilancia e pequeno mantemento dos centros (776.500 euros), as reparacións e mantemento en colexios (750.000 euros, 25.000 máis que o ano pasado), a enerxía eléctrica (532.500 euros) e o mantemento das caldeiras de calefacción (112.062 euros). A demolición do edificio de vivendas do Ceip Canicouva conta cun orzamento de 60.175 euros.
As nove escolas infantís municipais, “completamente gratuítas para as familias”, alcanzan en 2027 un orzamento de 2.575.525 euros, unha suba do 8,31% respecto a 2026: Lavadores, 288.500 euros; Navia, 272.250; Praza da Industria, 232.924; Saiáns, 288.500; Teis, 273.400; Tomás Alonso, 238.567; Bouzas-Casiano Martínez, 251.092; Mestres Goldar, 265.000; e Bembrive, 465.292. Ademais, o Concello destina, “por obrigación da Xunta de Galicia”, 205.500 euros á cofinanciamento das escolas infantís autonómicas da rúa Palencia e de Hernán Cortés.
Ensinos artísticos e obras
En ensinos artísticos, a Escola municipal de artes e oficios conta con 1.529.314 euros, con subvención do 100% para o alumnado; a Escola municipal de teatro suma 111.489 euros (75% de subvención); a Escola Municipal de música tradicional e folk – ETRAD, 282.750 euros (90%); a Escola municipal de danza, 164.739 euros (96%); e a Escola municipal de música, 485.733 euros (70%).
Entre as obras proxectadas para 2027 figuran: a cuberta do Ceip Coutada-Beade (80.000 euros), a mellora do inmoble da Escola Infantil Navia (48.500), a mellora da Escola Infantil Atalaia (70.000), a cubrición do patio do colexio Celso Emilio Ferreiro (150.000), o peche da parcela do Ceip Mestres Goldar (100.000), a mellora do acceso ao Ceip Ramón e Cajal (15.000), o muro de contención do Ceip Mosteiro Bembrive (160.000) e a reposición do muro da Escola Infantil Villa Laura (110.000).
O orzamento reserva ademais 225.000 euros para a UNED, 110.000 para a Biblioteca do Auditorio Mar de Vigo, 345.300 para a Biblioteca Neira Vilas (10.000 máis que o ano pasado), 90.000 para o programa municipal Vigo educa, 48.655 para a Biblioteca de Navia, 39.000 para o Programa de educación básica de persoas adultas e 50.000 para os Programas educativos.
Fonte: Concello de Vigo
