O FIC Vía regresará a Verín do 26 ao 31 de outubro para celebrar a súa décima edición cunha programación formada por 33 curtametraxes procedentes de máis de vinte países distintos. A proposta reúne creacións de diferentes contextos e linguaxes, e combina cineastas con percorridos en festivais internacionais con novas voces e primeiras obras.
A programación oficial estará formada por 25 curtametraxes a concurso, distribuídas entre as seccións A Raia e Nova, mentres que Horizontes ofrecerá outras oito obras nunha sección paralela. Segundo o festival, o FIC traballa para manter as bases sobre as que naceu mesmo dez anos despois: achegar a Verín unha mirada ampla sobre o cinema contemporáneo sen perder a conexión co territorio galego-portugués.
Dúas seccións oficiais a concurso
A sección Nova reúne 16 curtametraxes de procedencias moi diversas e permite percorrer diferentes formas de abordar o presente a través da ficción, o documental e a animación. A selección combina primeiras obras con traballos de cineastas con percorridos en festivais como Cannes, Donostia, Locarno, Venecia, Toronto ou Karlovy Vary. Entre os temas presentes aparecen a masculinidade e a violencia, a fama e a exposición pública, a cambio climático, os conflitos bélicos ou as migracións.
Pola súa banda, A Raia incorpora nove curtametraxes vinculadas principalmente ao espazo galego-portugués. A selección reúne obras de Portugal e Galicia xunto con coproducións con Francia, Croacia e Alemaña, e combina ficción, documental, animación e propostas autobiográficas. Entre os cineastas seleccionados hai autores con presenza en festivais como Cannes, Locarno, Clermont-Ferrand, Saraxevo ou Doclisboa, xunto con novas voces e primeiros traballos. Territorio, memoria, familia, coidados, masculinidade, migración e relacións de poder figuran entre as cuestións que percorren as obras desta sección.
Horizontes, a sección paralela
Horizontes convértese nesta edición nunha sección paralela formada por oito curtametraxes que quedan fóra das dúas categorías oficiais a concurso, aínda que poden optar ao Premio Especial do Público. A selección amplía a diversidade de linguaxes con propostas de Alemaña, Francia, España, Canadá, Irán, Reino Unido e Estados Unidos, e reúne ficción, animación, documental, ensaio audiovisual e vídeo collage. A sección inclúe tamén traballos de artistas e cineastas con presenza en espazos como Tate Britain, a Bienal de Venecia, Sundance, Rotterdam ou DOK Leipzig.
Premios
As dúas seccións oficiais competirán polos principais premios do festival: o Premio do Xurado á Mellor Curtametraxe de A Raia e o Premio do Xurado á Mellor Curtametraxe de Nova, ambos dotados con 1.000 euros e trofeo. Ademais, haberá un Premio Especial do Público, dotado con 600 euros e trofeo, e un Premio do Xurado Novo, que escollerá unha curtametraxe das seccións oficiais e recibirá un premio non monetario.
O fío vertebrador desta décima edición, baixo o lema «A verdade nunca foi tan fráxil», propón unha reflexión sobre un contexto marcado pola desinformación e o ruído dixital, unha cuestión presente de formas diferentes ao longo da programación.
Claves
- Datas: do 26 ao 31 de outubro en Verín.
- Edición: X aniversario.
- 33 curtametraxes en total, 25 a concurso, de máis de 20 países.
- Seccións: A Raia, Nova e Horizontes.
- Lema: «A verdade nunca foi tan fráxil».
- Os abonos sairán á venda proximamente e avisarase mediante as canles oficiais do festival e do concello de Verín.
Fonte: Concello de Verín
