O Museo de Pontevedra organiza un novo curso sobre a relación da moda coa arte e a historia, titulado ‘Alegacións a Medida: Moda do Século XX’. O curso comeza este mércores e prolongarase durante dez semanas.
Non é a primeira incursión do museo nesta materia: en 2024 dedicou un curso á evolución da moda dende o Antigo Exipto ata finais do século XVIII, e en 2025 o curso centrouse no século XIX. Como nas anteriores edicións, a docente será Carolina Munáiz.
As sesións celebraranse os mércores ás 19:00 horas no Edificio Castelao, dende o 7 de outubro ao 9 de decembro. Cada sesión terá hora e media de duración e centrarase na vinculación e incidencia da moda de determinados momentos ou acontecementos destacados do século XX nos ámbitos da historia e da arte, con especial incidencia da música e do cinema.
As dúas primeiras sesións centraranse na final do século XIX e o comezo do XX, coa carreira vangardista. A partir da terceira sesión farase un percorrido década a década, dende a moda para a evasión dos anos vinte ata a antimoda pudorosa dos anos noventa.
Carolina Munáiz é docente na Escola Superior de Deseño de Moda Formarte da Coruña, titulada en Ilustración pola EASD Pablo Picasso e con formación de primeiro ciclo da Escola de Canteiros de Pontevedra. É profesora das materias de Historia do vestido e de Historia da arte e da moda do século XX, e compaña a súa labor docente coa súa traxectoria como pintora.
O programa completo do curso é o seguinte: o 7 de outubro, ‘Final de século, final dunha vestimenta’; o 14 de outubro, ‘Comeza o século XX. A carreira vangardista’; o 21 de outubro, ‘Anos vinte. Moda para a evasión’; o 28 de outubro, ‘Anos trinta. Entroido en tempos duros’; o 4 de novembro, ‘Anos corenta. Contenda e competencia’; o 11 de novembro, ‘Anos cincuenta. Conservadorismo dourado’; o 18 de novembro, ‘Anos sesenta. A alta costura á rúa; a rúa á revolución’; o 25 de novembro, ‘Anos setenta. Cambios de xénero, brillos e anarquía’; o 2 de decembro, ‘Anos oitenta. Materialismo en talle grande’; e o 9 de decembro, ‘Anos noventa. A antimoda pudorosa’.
Claves
- O curso é de acceso libre.
- Quen queira obter un certificado de asistencia deberá inscribirse previamente en reservas.museo@depo.gal e asistir como mínimo ao 70% das sesións.
- As sesións celébranse os mércores ás 19:00 horas no Edificio Castelao, do 7 de outubro ao 9 de decembro.
Fonte: Deputación de Pontevedra
