O presidente da Deputación de Pontevedra, Luis López, reafirmou o compromiso da institución co tecido empresarial da provincia durante a gala de entrega da decimoctava edición do Premio Xove Empresario do Ano, organizada pola Asociación de Xoves Empresarios (AJE) de Pontevedra este mércores no Centro Sociocultural de Tenorio, no concello de Cerdedo-Cotobade.
López destacou diversos programas de apoio ao empresariado provincial, entre eles un investimento de 3,7 millóns de euros para fomentar o emprego este ano, a completa ocupación do polígono empresarial de Barro-Meis e as distintas iniciativas postas en marcha para impulsar o emprendemento entre a mocidade.
«Esta gala é moito máis que unha mera entrega de premios. É a constatación de que Pontevedra conta cun tecido empresarial profesional, potente e comprometido; é a demostración da capacidade da provincia para emprender, innovar e destacar nun ecosistema global; e é a evidencia de que os emprendedores e empresarios non son seres malvados, senón persoas que arriscan o seu tempo e patrimonio para mellorar a calidade de vida de todos», declarou o mandatario provincial.
Na gala participaron tamén o alcalde e deputado provincial, Jorge Cubela; a conselleira de Infraestruturas e Vivenda, María Martínez Allegue; o presidente de AJE Pontevedra, Carlos Fontán, e outros representantes de institucións públicas da provincia e do tecido empresarial. López, xunto a Cubela, foi un dos encargados de entregar os galardóns aos empresarios recoñecidos.
A gala serviu para entregar distincións a figuras do ámbito empresarial, do emprendemento e da mocidade pola súa contribución ao desenvolvemento económico da provincia, con galardóns relacionados coa responsabilidade social e empresarial, a innovación, a iniciativa emprendedora e, finalmente, o premio ao mellor empresario novo do ano.
«Sexa cal sexa o sector, a antigüidade ou a facturación; todas e todos contribuídes á construción dunha provincia máis competitiva, máis forte e con máis oportunidades», valorou López despois de recoñecer o labor de AJE e agradecer ao alcalde Jorge Cubela a colaboración para a celebración do evento en Cerdedo-Cotobade.
Fonte: Deputación de Pontevedra
