O tudense Carlos Fer deseña o cartel das Festas de San Telmo

Cartel do artista Carlos Fer para as Festas de San Telmo 2026 de Tui. / CONCELLO DE TUI

O Concello de Tui xa ten o cartel anunciador das Festas de San Telmo, que se celebrarán do 4 ao 13 de abril. O artista tudense Carlos Fer é o autor do deseño, do que é protagonista a figura dunha muller vestida co traxe tradicional. Así, o nome de Carlos Fer súmase a Víctor Aparicio e Carlos Lago, que deseñaron o cartel das festas patronais de Tui nas últimas edicións, sendo esta unha aposta do Concello de Tui por visibilizar os artistas locais e reflectir no cartel de San Telmo a visión dun ou dunha tudense.

Sobre a obra, o autor explica que «a figura está a bailar unha muiñeira, un movemento de ledicia, que activa a tradición como práctica atemporal, capaz de renovarse cada vez que se canta e se baila».

O artista sitúa a escena nun tempo indeterminado, entre a amencer e o solpor, nun momento no que a festa comeza ou continúa. A figura sostén o barco e a vela de San Telmo en cada man, converténdose en sinais de identidade e de orgullo de pertencer a un lugar. «Desta maneira, o espírito de San Telmo aparece encarnado nun corpo que baila, participa e fai comunidade», engade Carlos Fer.

O cartel recolle tamén unha referencia ao oitavo centenario da consagración da catedral, que aparece ao fondo do deseño, onde se abre tamén a escena ao outro lado do río, en Valença. Deste xeito, o artista plasma «a relación entre Tui e Valença como Eurocidade, onde as celebracións, os encontros e os ritmos circulan dun lado a outro do río, construíndo unha identidade compartida na que esa fronteira acuosa funciona como ponte».

Desde o Concello de Tui agradecen a Carlos Fer que aceptase o encargo de crear a imaxe das Festas de San Telmo, declaradas de Interese Turístico de Galicia. O artista, graduado en Belas Artes pola Universidade de Vigo, ten experiencia como docente e a súa obra expúxose en cidades como Bilbao, Luxemburgo ou Lisboa. Ademais, realizou residencias artísticas e estancias de investigación en París, Bruxelas, Madrid e Galicia. Na súa traxectoria destacan tamén varios premios internacionais, e, recentemente, foi finalista do décimo Premio Cervezas Alhambra Arte Emerxente ARCO.