O presidente da Deputación de Pontevedra, Luis López, e o alcalde de Agolada, Óscar Val, asinaron no Pazo Provincial o convenio para a recuperación da praza da Alameda de Brántega e o seu contorno. O proxecto inscríbese na segunda convocatoria do Plan Provincia Extraordinaria – Plan Extra.
A achega provincial ascende a 588.235 euros e financia ao 100% o proxecto mediante a combinación de dúas fontes: 500.000 euros do Plan Extra e 88.235 euros do programa +Provincia. O Plan Extra reparte 35 millóns de euros entre 57 concellos de menos de 50.000 habitantes da provincia que resultaron beneficiarios nesta segunda entrega.
Segundo o convenio, o proxecto ten como obxecto incrementar e mellorar os niveis de funcionalidade, seguridade viaria, accesibilidade e calidade do espazo público da praza da Alameda de Brántega e o seu contorno, ademais de realizar actuacións complementarias de renovación das redes de servizos.
Entre os traballos previstos figura a reordenación dos viarios e a execución dunha plataforma única, a ampliación do espazo peonil e a redución da mediana de circulación de vehículos ao estritamente necesario. As beirarrúas contarán con pavimento de lousas de granito e a calzada será de formigón.
Tamén se peonizará o tramo que conecta a praza co auditorio, para resolver a conexión visual e funcional da praza coa entrada á zona histórica de Agolada, mediante bancadas e escaleiras que salvarán a diferenza de cotas.
No interior da praza reorganizaranse os espazos con novos pavimentos e escaleiras para a circulación peonil, respectando a arboredo existente, a fonte circular central, a pequena fonte e as marquesinas circulares de formigón. O parque infantil reconfigurarase con novos elementos de xogo, pavimentos máis seguros e unha zona de xogo de petanca.
O proxecto contempla, así mesmo, a substitución das antigas luminarias, a reorganización da ubicación dos novos puntos de luz e do mobiliario urbano, e novas redes de servizos.
Claves
- Achega provincial: 588.235 euros, que financian ao 100% o proxecto.
- Fondos: 500.000 euros do Plan Extra e 88.235 euros do +Provincia.
- Proxecto: recuperación da praza da Alameda de Brántega e o seu contorno en Agolada.
- Marco: segunda convocatoria do Plan Provincia Extraordinaria – Plan Extra, que reparte 35 millóns de euros entre 57 concellos de menos de 50.000 habitantes.
Fonte: Deputación de Pontevedra
