Vigo acolleu este luns, 5 de outubro de 2026, a apertura do «XIV Congreso internacional Smart Blue Leaderships da FAO. Eficiencia, intelixencia e estándares globais para unha industria comprometida», un encontro organizado pola FAO, o Ministerio de Agricultura e Conxemar que reúne na cidade a expertos, responsables institucionais e empresarios de todo o mundo para perfilaren as liñas do futuro do sector pesqueiro.
O alcalde de Vigo, Caballero, iniciou a décimo cuarta edición do Congreso destacando o peso da cidade no fomento da cooperación internacional do sector pesqueiro. «Esta é a reunión da cooperación, dos que queredes intercambiar coñecementos e opinións sobre todos os mares e océanos do mundo para conseguir unha alimentación mellor, máis saudable e eficiente cos produtos do mar, creando emprego», recalcou o rexedor durante a inauguración, que se celebra previa ao comezo da vixésimo sétima edición da Feira Internacional de produtos do mar conxelado, Conxemar.
Caballero referiuse tamén ao papel das novas tecnoloxías e do crecente uso da intelixencia artificial nos distintos procesos do sector, que «deben seguir sendo utilizadas para a boa forma de entender a cooperación e conseguir un mundo mellor e non para que a tecno-oligarquía domine en todo o mundo», segundo as súas palabras.
O alcalde felicitou así mesmo aos organizadores de Conxemar por reunir en Vigo aos principais interlocutores e axentes da ciencia, as empresas e as administracións «no avance da humanidade e da mellora da calidade de vida, do benestar e da alimentación de miles de persoas».
O presidente de Conxemar, Eloy Alvariza, incidiu en que o futuro dos alimentos acuáticos será internacional e que «temos a oportunidade de facelo ben desde a cooperación». Pola súa banda, Miguel Bernal, secretario executivo da comisión xeral de pesca para o Mediterráneo da FAO, subliñou que «a xestión adecuada das distintas pesqueiras xera recursos xeración tras xeración» e que unha «eficaz xestión pesqueira funciona».
A secretaria xeral do Ministerio de Agricultura, Pesca e Alimentación, Isabel Artime, recoñeceu ao sector da pesca como «estratéxico» na economía española e agradeceu a súa adaptación ao novo marco europeo tras a posta en marcha do sistema de rastrexabilidade dixital das capturas. Artime chamou tamén aos terceiros países a unírense a un proceso de control que, nas súas palabras, «nos beneficia a todos».
O Congreso celébrase en Vigo xusto antes do inicio da vixésimo sétima edición da Feira Internacional de produtos do mar conxelado Conxemar, o que converte a cidade estes días en punto de encontro do sector pesqueiro internacional.
Fonte: Concello de Vigo
